THERMAL guns ug forehead thermometers ang gitunol sa Kapitolyo Probinsyal ubos ni Misamis Oriental Governor Bambi Emano alang sa mga seaports ug airport sa Misamis Oriental kagahapon dungan sa pagpakayab sa nasudnong bandila.
Sa tinguha ni Emano nga dili makasulod ang gikahadlokang coronavirus disease (Covid-19) dinhi sa lalawigan, nipalit kini og thermal guns ug forehead thermometers alang sa seaport sa Macabalan ug Balingoan ug sa Laguindingan Airport. Gidawat ang mao mga equipment sa mga representante sa Philippines Ports Authority (PPA) ug Civil Aviation sa Laguindingan.
Gibutyag ni Emano nga ang thermal guns mo-detect og hilanat sa mosulod sa airport tulo ngadto upat ka metro ang kalay-on ug gamit sab kaayo ang thermometers aron pagsusi sa hilanat sa langyaw nga mahidangat.
"We have to purchase more kay diha lang daan sa Laguindingan Airport, libo libo ang moabot diha ug basin unya madaot atong thermal guns," matud ni Emano.
Sa iyang bahin ni Dr. Jerie P. Calingasan, ang Misamis Oriental Provincial Health officer, nibutyag niini nga dako kini og tabang nga diha pa lamang sa mga pantalan ug airport mahibaloan na ang gibati sa langyaw.
Naghatag sab kini og update sa Covid-19 kon diin mikabat na sa 2,000 kapin ang namatay sa nasud sa China, 70,000 ang nataptan ug kasamtangan gitambalan, samtang anaa na usab 500 ka kaso sa nasud sa Japan ug gatusan sa South Korea.
Pabilin sila nga nagpahimangno nga kung adunay gibati magsul-ob og mask, kanunay maghugas og kamot ug magdala og alcohol.