ALEGRE kaayo ang kalihukan sa pista sa sityo Herbarium, sakop sa lungsod sa Sibundoy. Karong gabhiona nagpasiugda ang komitiba og Miss Gay Beauty Contest diin 12 ka bayot ang mirampa. Way kabutangan sa hudyaka ug katawa sa mga nanan-aw. Nagsugod nag basa ang master of ceremonies (MC) ibabaw sa bantawan sa mga ngalan sa mga tawong nakapalampos sa maong programa.
Dili gyud opisyal nga gida sa simbahan nga pistahan ang maong sityo. Apan ang mga lumolupyo dinhi nga kasagaran mga tubig-tubigan ug mga ‘fun-loving’ nga pamilya magpundok gyud kada katapusang Sabado sa bulan sa Mayo. Ilang patron si San Isidro Labrador. Hapit lima ka tuig na nga wa kini masaulog tungod kay may duha ka pamilya nga nag-away-away. Apan karon nagpinasayloay na ug nag-uli na sa maayong kabubut-on. Ug mibalik ang kaalegre sa sityo.
Wala silay kapunongan nga opisyal. Walay presidente o mga opisyal. Puro mga miyembro ra. Apan dunay mga tinamod nga mga tawo sa balangay nga gitahod. Sama ni Ritchie Tibon nga kasamtangang bise mayor sa lungsod ug nia magpuyo dinhi. Si Roy Zapanta nga kanhi barangay kapitan sa baryo Putomayo diin mahisakop ang maong sityo, nia sab magpuyo dinhi. Si Wilbert Duhig nga kanhi konsehal sa lungsod nia sab magpuyo dinhi. Daghan sab ang mga propesyonal nga residente dinhi sama sa doktor, abogado, enhinyero, seaman ug mga negusyante.
Apan may pipila sab ka uyamot nga mga tawo sama sa mga estambay, sugarol ug palahubog. Wa gyud hinuoy hilabtanon sama nianang mamaregla o mangitag away.
Si Norelyn Rosaldo maoy nasugoan sa bise mayor nga mangulekta og amot sa mga silingang way libog ug hilig moamot. Wa lang maghunahuna ang bise mayor nga sugarol si Norelyn kinsa buwag sa bana ug way klarong pangita. Gisungko ni Norelyn si Jerome Bertes nga usa ka ‘seaman’.
“Nag-ingon si Bise nga tunga kuno mo sa talent fee sa mga bayot,” ni Norelyn.
“Pila may talent fee nila?” ni Jerome.
“P2,400 tanan. Dose sila. Tag dos sintos pesos kada usa,” ni Norelyn.
“O, sige.” ni Jerome nga nagbarog sa ilang balay. Gikuot niya ang iyang pitaka. Mikuhag usa ka tibuok libo ug duha ka tibuok gatos nga papel de banko.
“Tambong gyud unya kay mag-reserba kog lamesa para nimo,” ni Norelyn.
“Morag di ko katambong. Naa koy importanteng lakaw anang gabhiona.” ni Jerome. May nahunahunaang laraw si Norelyn.
May diyutayng depekto ang mga dumuduong sa pista. Morag mga gutom nga mga hayop.
Pagyamada nga magsugod na ang pangaon, ang duha ka inasal baboy nakalabera dayon wa dantig usa ka minuto. Ang inasal lupig pay giagian og mga piranha.
Lingaw kaayo ang nanambong sa programa. Nanghugyaw. Nangatawa. Hapit mangahagbong sa lingkuranan. May nakasuka kay nabugwak ang ilimnon, kay naatlang miyarok og bino, unya wa kapugong sa pagkatawa. Tiaw mo bay, nagdrama-drama ang mga bayot! May nag-stand up comedian. May nag-fashion show. May mikantag ‘medley’ nga puro kataw-anan. May nanayaw.
Nalitok na sa MC ang mga ngan sa mga esponsor. Sa mga amot, subra sa gastuhan ang nakolekta ni Norelyn. Gusto niyang ibulsa ang amot ni Jerome. Wa niya ilakip sa listahan sa mga esponsor ang ngalan ni Jerome. “Basin way makadungog nga wa mabasa ang iyang ngan,” ni Norelyn sa hilom.
Ang miamot sa duha ka inasal baboy kay sila Mary Grace Bacus ug napulo ka mga silingan nga nangamot og tag kiniyentos pesos kada usa. Sa P5,000, may subra na si Norelyn nga dos sintos. Kay P4,800 ray gasto: P2,400 sa sound system ug P2,400 sa mga bayot.
Pagka humag basa sa MC sa mga ngan sa esponsor, way mireklamo nga wa mabasa ang ngan ni Jerome. Nahimuot si Norelyn. Apan may mikablit sa iyang luyo samtang siya naglingkod atubangan sa bantawan. Nakugang siya sa iyang paglingi kay si Jerome ang mikablit kaniya.
“Bawion nako akong P1,200, kay wa ko kadungog sa akong ngan!” ni Jerome.
Wa makatingog si Norelyn. Nangluspad nga miabli sa iyang pitaka nga diha ra sa iyang kamot. (Katapusan)