DUNA nay plano alang sa secondary routes ilabi na sa Barangay Cugman paingon sa Barangay Puerto nga bahin aron dili na moagi ang mga tricabs ug sikad sa national highway sa siyudad sa Cagayan de Oro.
Kini human nagmando ug nagpagawas og memorandum ang Department of the Interior and Local Government (DILG) nga gidili na gyud ang pag-agi sa maong mga sakyanan sa national highway alang na usab sa kaluwasan.
Gibutyag ni Acting City Administrator Teodoro Sabuga-a nga duna nay plano ang lokal nga kagamhanan sa siyudad gani atol sa ilang pagbisita, duna nay mga dalan nga mahimong maagian gawas lang sa tulay nga angay mabuhatan tungod kay duna may mga suba sa maong dapit sama sa Barangay Agusan.
"Naa'y ang among buhaton dinhi nga inter-barangay roads, gitan-aw namo karon didto pwedi na maagi-an except nga naay tulay tungod kay naay river sa Agusan so karom gi-apil na na namo sa programa nga magbutang gyud ta og tulay," matud ni Sabuga-a.
Gidugang pa nga tungod sa kadako sa gasto og paghimo og tulay, plano sa lokal nga kagamhanan sa dakbayan nga magpatabang sa nasudnong gobyerno o mahatagan og pundo.
Kung magmalampuson kini nga proyekto, ang tanan makabenepisyo ug labi na ang mga barangay diha sa paghimo og ordinansa aron sa pagpa-rehistro sa mga sakyanan aron usab nga mokita.
Tumong niini nga wala nay mga bisikleta, motorcab ug uban pa nga mog-agi sa highway.