PITO ka mga animal quarantine checkpoints ang gi-establisar sa Anti-Task Force alang sa hugot nga pagbantay aron dili makasulod ang sakit nga dala sa baboy o African Swine Fever sa dakbayan sa Cagayan de Oro.
Ang pito ka mga entry points mao ang Barangay Puerto, Barangay Bugo, boundary sa Barangay Balubal ug Manolo Fortich sa eastern part ug western part mao ang Barangay Mambuaya, Barangay Indahag, Barangay San Simon, ug crossing sa Barangay Lumbia.
Gibutyag ni Dr. Lucien Anthony Acac, veterinarian sa City Veterinary Office sa dakbayan, nga gihimo kini aron dili makasulod sa dakbayan ang maong virus labi na nga duol na kaayo sa Bukidnon ang usa sa mga Barangay sa Davao nga positibo sa maong sakit.
"Padulong na gyud sa Bukidnon ang kagaw, what we did in Cagayan de Oro we established animal quarantine checkpoints in seven entry points from our neighboring province like Bukidnon and Misamis Oriental," pahayag ni Acac.
Gidugang pa niini nga tumong niini nga mapugngan ang pagsulod sa mga sakyanan nga gikan sa gawas sa Cagayan de Oro labi na kung dunay mga kargang produkto nga baboy.
"Ang purpose ani is to intercept all vehicles coming from the outside of Cagayan de Oro," dugang pa.
Kahinumdoman nga niadtong nilabay nga semana, dunay gisunog nga anaa sa mga 600 kilo human nakumpiska nga sulod sa meat van nga gikan sa Davao.
Naghangyo usab kini nga motaho gyud dayon sa ilang buhatan kung ugaling dunay mga mamatikdan o kasayoran kalabot na sa mga produktong baboy nga gikan gawas sa dakbayan.