DILI lang minilyon ang nanggawas sa ilang kabalayan ngadto sa Edsa kaniadtong Pebrero 22-25, 1986. Minilyon sab ang nanggawas sa kadalanan sama sa Recto, sa Mendiola, sa Legarda ug ubang dalan libot sa Malakanyang didto sa Metro Manila.
Niawas sab ang Fuente Osmeña ug ang Osmeña Blvd. dinhi sa Siyudad sa Sugbo. Mao sab didto sa ubang mga siyudad sa tibuok nasod. Ang pag-alsa sa Edsa dili lang sa mga taga Metro Manila. Pag-alsa kadto sa tibuok nasod.
Ako mismo testigo sa nahitabo sa Recto, Legarda ug Mendiola kay didto man ko sa buntag sa Pebrero 23, 1986. Mao man gud ang sabot namo uban sa pipila ka mga classmate ug schoolmates sa San Sebastian College. Nagkuha man ko og political science niadtong tungura.
Sa Pebrero 22, nagtigom mi sa usa ka balay diha sa Sta. Mesa. Samtang nag-meeting, amo sab nga nakuha sa telebisyon ang panghitabo kabahin sa balita gikan sa Malakanyang ug grupo nilang Defense Minister Juan Ponce Enrile.
Paghuman sa meeting, nipadayon ko og monitor sa mga balita labi na ang press conference nilang Enrile ug General Fidel V. Ramos diha na sa usa ka kan-anan sa Cubao. Diha na ko sa balay sa akong tiyo pag-anunsyo ni Butz Aquino nga magpundok diha sa Cubao ug momartsa padulong sa Edsa.
Wala na ko pagawsa sa balay sa akong tiyo kay basin magubot. Apan halos wala kamiy tulog nga nag-monitor sa mga panghitabo.
Bisan pa man, sayo kaayo ko nga nilakaw sa sunod adlaw padulong sa tunghaan sa Recto apan wala mi mag-abot sa among grupo.
Duha pa mi ang nagkita dihang kalit nga dunay mga buto-buto. Mao na kadtong giguba sa mga raliyesta diha sa Mendiola ang mga barbwire sa barricades.
Pagkaudto, among hunahuna nga lisod na kami magkapundok pa, di na man makontak sa telepono ang among mga sakop. Di sab mi makasulod sa campus kay gisirad-an. Wa pa may cellphone niadtong panahona.
Nakadesisyon ming duha nga moadto na sa Edsa. Naglakaw unya kapyot og PUJ kay wala na may modiretso sa Edsa.
Dili ko makalimot sa talan-awon dihang naabot mi sa Cubao. Nakalimot ko unsay akong gitungtungan apan nakita nako ang kadaghan sa mga tawo sa Cubao padulong sa Camp Crame ug Camp Aguinaldo.
Gabii na ko nakapauli kay wala koy nakit-an nga mga kaila niadtong tungora ug gutom baya.
Sa sunod nga mga adlaw, akong mahinumdoman nga nakatawag ko sa usa ka amiga nga paadtuon ko sa Pasig kay tua didto ang ilang grupo nga Namfrel. Apan lisod moadto kanila kay molabang pa sa kahuot sa mga tawo.
Ang ako lang masulti karon nga kadto usa ka higayon nga nagkahiusa ang katawhan batok sa diktadurya ni Marcos.
Tinuod, daghan namong gustong mahitabo ang wala madayon. Apan, niadtong tungora, atong napalagpot ang diktador. (anol_cebu sa Twitter)