DI DIAY. Ang wa pa makaila o masuhito sa estilo ni Presidente Rodrigo Duterte di gyud makasubay sa punto nga iyang gusto nga ipasupot. Ang tanan, labina sa iyang mga minyon o alalay sa Presidente nagtuo gyud nga ang basi sa iyang gipamung di na mabag-o pa ang prankisa sa ABS-CBN igtapos niini sa Marso 30, 2020, apan dili diay.
Gani, si Solicitor General Jose Calida, nga sangga ni Presidente Duterte, abtik nga mipasaka og petisyon nga Quo Warranto sa Korte Suprema aron di na mahatagan og prankisa ang ABS-CBN, nga karon gihatagan og atensyon sa Senado kay dunay committee hearing nga pagahimuon sa aplikasyon nga mabag-o ang ilang prangkisa.
Niadtong Biyernes, dihang midako na ang isyu kay dunay mga kalihokan nga protesta batok sa laraw sa kagamhanang Duterte nga isira na ang ABS-CBN, si Sec. Sal Panelo, ang tigpamaba sa Malakanyang, mihatag og katinawan sa medya nga di sabton literal ang hulga ni Presidente Duterte batok sa ABS-CBN.
Matod ni Panelo, ang buot ipasabot ni Duterte mao nga iyang ipasira ang “fraudulent practices” kon malimbungon nga pamaagi sa ABS-CBN.
Si Duterte human modaug sa piniliay niadtong 2016, mibahad nga iyang ipasira ang ABS-CBN tungod kay wa gipagawas ang iyang political ads.
Gani, niadtong Dominggo miingon na sad si Panelo nga walay interes ang Presidente nga maminaw sa senate hearing nga maghatag higayon sa ABS-CBN nga mopatin-aw sa Senado nganong angayan nga bag-ohan ang ilang prankisa.
Giakusahan usab ang ABS-CBN nga nakasupak sa lagda nga ang negosyo sa komunikasyon sama sa TV network iya lang sa mga Filipino tungod kay nagbaligya kini sa mga langyaw og shares pinaagi sa giingon nga Philippine Deposit Receipts (PDRs). Apan, matod pa, dili kini ebidensya sa pagpanag-iya og bahin sa usa ka korporasyon.
Samtang naa pa sa Korte Suprema ang quo warranto petisyon ni Calida, si House Speaker Alan Peter Cayetano mipahayag nga mahimo ra nga mopadayon ang operasyon sa ABS-CBN hangtud sa Marso 2022 diin matapos usab ang termino sa ika-18 nga Kongreso samtang ang ilang aplikasyon sa bag-o nga prangkisa pending pa. Mao usab kini ang opinyon ni Sen. Franklin Drilon.
Naitok si Speaker Cayetano sa gipahigayon nga committee hearing sa Senado sa aplikasyon sa ABS-CBN nga mabag-o ang ilang prankisa. Matod ni Cayetano, nakasupak sa Batakang Balaod ang gibuhat sa Senado tungod kay ang aplikasyon sa prangkisa adto man magsugod sa Kamara baha.
Apan ang mga senador nga pabor sa pagahimuon nga committee hearing sa aplikasyon sa ABS-CBN nga mabag-o ang ilang prangkisa wa matarog sa gisulti ni Speaker Cayetano kay ang ilang gibuhat usa ka pag-abag sa mga balaudnon nga pandayon unya sa Senado.