LONG weekend gyud kay gikan sa Sabado, Dominggo, gahapon holiday dinhi sa dakbayan sa Sugbo kay gisaulog ang ika-83 nga Charter Day anniversary ug karon non-working holiday usab sa tibuok nasod gumikan kay atong gisaulog ang ika-34 ka tuig nga anibesaryo sa Edsa People Power Revolution. Nahitabo ang maong makasaysayanong panghitabo mga 34 ka tuig na ang nakalabay diin gipalagpot ang diktadoryang pangagamhanan ni Ferdinand Marcos. Usa ka civilian nga gisuportahan sa militar nga rebolusyon.
Si kanhi Presidente Cory Aquino maoy mihulip ni Marcos human sa rebolusyon. Si Aquino maoy giila nga simbolo sa demokrasya. Giusab ang atong Batakang Balaod niadtong 1987 nga naghatag na og igong kagawasan sa katawhan. Dili susama sa panahon ni Marcos nga gipig-utan ang halos tanan labi pa ang kagawasan sa prensa.
Apan unsa may naani nato human nakigbisog ug milampus ang rebolusyon? Nabalik tuod ang demokrasya sa mga nangagi ug nanglabay’ng mga administrasyon? Milambo ba ang atong nasod? Nahaw-as ba ang kadaghanan sa katawhan gikan sa kakabus? Nahatagan ba og katumanan ang dugay na natong gipangandoy nga moasenso ang atong panginabuhi?
Wala man. Daghan man gihapon ang mga nag-ilaid sa tumang kalisod. Taas man gihapon ang haw-ang sa mga kabus ug adunahan. Wala man gihapon mahatag ang batakang panginahanglan sa katawhan. Sama sa trabaho, serbisyo sa panglawas ug daghan pang angayan unta nga ipaabot sa gobiyerno ngadto sa iyang katawhan.
Nausab ba ang atong mga pulitiko nga maayo lang mosaad sa mga botante panahon sa eleksiyon? Apan kon makadaug na ug makalingkod na sa puwesto, nakalimtan na ang tanan ug ang ila na lang personal nga katuyuan ang giatubang? Nawagtang pa ang kurapsiyon ug ang pag-abuso sa mga tawo nga anaa sa gahom? Nawagtang ba ang mga dagkong negosyante nga gihatagan og pabor sa mga namunuan?
Atong gikondenar si Marcos ug ang iyang cronies niadtong ilang panahon, apan karon anaa gihapon kining maong sistema. Unsa ba ang atong naani human sa Edsa? (bobbygnalzaro@gmail.com)