SA TINGUHA nga makatabang sa kinaiyahan, nananom og 5,000 ka seedlings ang Tau Gamma Phi (TGP) niadtong Pebrero 22, 2020, didto sa Barangay Taptap, dakbayan sa Sugbo.
Tinguha sa TGP nga makatanom og 15,000 ka seedlings sa duha ka bukirang mga barangay sa siyudad sa Sugbo.
Si Edgardo “Jaypee” Labella II, kamaguwangan nga anak ni Cebu City Mayor Edgardo Labella ug miyembro sa TGP, niingon nga ang gibuhat sa ilang fraternity mao ang pagsuporta sa administrasyon sa iyang amahan kinsa nagtinguha nga motanom og tres milyones ka mga kahoy sulod sa iyang unang tulo ka tuig isip mayor.
Nipaluyo usab sa ilang tree planting ang Talino at Galing ng Pinoy (TGP) Partylist pinangulohan ni Kongresista Jose “Bong” Teves Jr., kinsa nisuporta usab sa mga plano sa Cebu City Government.
Gipadayag ni Jaypee nga target sa ilang grupo nga makatanom og tag 5,000 ka seedlings sa mosunod nga mga Sabado hangtod ilang matisok ang 15,000 ka mga punoan.
Si Jaypee nagkanayon nga ilang gitanom nga mga seedlings mao ang Narra, Guyabano ug Coffee.
Si Mayor Labella sa iyang bahin nagpasalamat sa Tau Gamma Phi gumikan sa ilang inisyatibo ug ngadto kang Jaypee kinsa maoy nagpasiugda sa kalihukan.
Ang anak sa mayor nibutyag nga himuon nga prayoridad sa Tau Gamma Phi ang pagpananom ug gibutyag ni Jaypee nga kon adunay dugang nga seedlings, magpadayon sila alang sa maong proyekto. (PAC)