Napule: Tricycle ban dakong hagit

GIHULAGWAY karon ni Mario Napule, pangulo sa City Traffic Management System CTMS, nga challenge alang kanila ug sa kagamhanan sa dakbayan sa Lapu-Lapu sa higayon nga did-an na unya ang mga tricycle sa national highway subay sa kamandoan sa Department of Interior and Local Government (DILG).

Matod pa nga ang naasoyng kamandoan kinahanglan og “political will” aron hingpit nga mapatuman ug nagkinahanglan sab nga tun-an pag-ayo.

Gipasabot ni Napule nga sa higayon nga ipatuman ang pag-ban sa mga tricycle sa national highway hayan dili na unya mahimo ang “pakyaw” system nga kasamtangang gihimo sa tricycle drivers sa pagkakaron.

Kini gumikan kay sa ilang plano sa matag tumoy nga bahin sa barangay road na kutob mobiyahe ang mga traysikol ug dili na mamahimong motadlas sa national road.

Nunot niini daghan ang dili mouyon sa maong pamaagi sanglit makuhaan man unya ang ilang kita gumikan sa ka limitado sa ilang biyahe.

Mihangyo si Napule og pagsabot gikan sa mga tricycle driver nga igo ra usab sila mituman sa kamandoan sa ilang labaw nga opisyal.

Ang Maximo Patalinghug Avenue ug sa Mactan Circumferential Road maoy nasudnong karsada sa dakbayan nga adunay tricyle nga mobiyahe.

Apan dili ang tibuok dalan gawas lang sa pipila ka bahin niini nga maoy nagsilbing agi-an sa mga traysikol sa ilang mga rota paingon sa mga eskina sa barangay road.

Ang Basak Road maoy sagad reklamo sa mga motorista tungod sa grabeng kahuot sa trapiko gumikan sa presensya sa mga tricycle, sumala pa ni Napole.

Giangkon ni Napule nga kalugakan ang kahuot sa trapiko sa national highway sa higayon nga ngadto nalang sa matag barangay road ang biyahe sa mga traysikol. (GCM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph