NAKURAT ang mga residente sa Sityo Lanipao, Barangay Sapangdaku, Cebu City sa dihang patayng lawas sa lalake ang nagbuy-od daplin sa kalsada.
Si P/Cpl. Rhoedan Tillor, imbestigador, nga ilang nadawat ang alarma niadtong Dominggo, Pebrero 23 sa gabii, sa dihang usa ka residente maoy unang nakakaplag sa maong lawas.
Nailhan ang maong lalake base sa nakuha nga identification cards ug calling cards diha sa iyang posisyon nga si Engr. John Ian dela Cruz-Chan, 38, nga taga-Sityo Oprra, Barangay Kalunasan, sa maong dakbayan.
Nasuta sab nga si Chan usa ka real estate broker base sa calling cards nga konektado sa Regina Capital nga nagbase sa Makati City, Metro Manila.
Samtang ang hepe sa Guadalupe Police Station (Station 9) nga si P/Capt. Janelito Marquez nagduda nga dili salvage maoy gikamatyan sa maong lalake human nga ilang gisubay ang area diin kini mapalgi.
“Ako man gyud ang nag-ocular didtoa, dili to salvage. Sa among nakita, duda ko nga self accident ning hitaboa tungod kay naay mga lama sa dugo sa kawayan mga 20 metros kung asa siya nahagba,” pamahayag ni Marquez.
Apan bisan pa man palawman pa sa kapulisan ang imbestigasyon aron sa pagtino kon unsay hinungdan sa kamatayon ni Chan.
Sa inisyal nga imbestigasyon, si Chan ug lain pang kauban, ang miadto sa usa ka hilit nga dapit sa maong barangay nga gilibutan og kawayan, nagtuo ang mga pulis nga suyopanan ang dapit gumikan sa nakitang mga ginamit nga tin foil.
Nakita sab ang samad diha sa tiyan nga bahin sa namatay nga gituohan nga natusok sa kawayan nga maoy posible nga hinungdan sa iyang kamatayon.
“Ang amo nang pagtuo pero amo pang paabuton ang resulta sa SOCO kon unsa ang resulta niini, apil natong samad sa biktima kon unsa gyud ang nakasamad ato,” dugang pa ni Marquez
Gisubay na sab sa kapulisan ang mga gikauban sa namatay aron mahatagan og katin-awan ang nahitabo. (BBT)