Landmarks sa Talisay City palambuon

SUNOD semana na kasugdan ang phase 1 sa pagpalambo sa Plaza ug kadagatan sa Barangay Poblacion, Talisay City.

Gitug-an ni Konsehal Rodulfo Cabigas, chairman sa committee on infrastructure, nga andam na ang pundo alang niini, apan magdepende nalang kini sa taga Department of Public Works and Highways (DPWH).

Gitinguha sa kagamhanan nga kasugdan na sa pagtrabaho ang phase 1 sa boardwalk, lakip na niini ang food court ug pagpanindot sa plaza sa Poblacion lakip na ang liberation park niini.

Gitinguha nga mamahimong world-class destination ang Talisay City nga maoy damgo ni Mayor Gerald Anthony Gullas.

Gani, sa miaging tuig pa lang nangulitawo ang mayor ngadto sa mga senador nga mobubo og pundo sa maong proyekto.

Dili mominos sa P100 milyones ang pundo alang sa maong proyekto.

Giangkon ni Cabigas nga aduna nay mga senador ang nihatag og ayuda hinungdan nga masaligon sila nga kasugdan na kini sa pagsugod pa lang sa Marso.

Ang mayor nibutyag nga buot niya makita ang kanindot na unya sa Poblacion nga maoy sentro sa dakbayan.

Sa maong paagi dako kini og matampo sa pagpalambo sa turismo sa dakbayan, dungan na ang paghatag og panginabuhian sa mga Talisaynon, ilabi na ang nabantog nga negusyo sa inasal ang Talisay. (FMD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph