MANINGIL na og pulta ang kagamhanan sa lalawigan sa Sugbo gikan sa mga motorista nga mo-park sa compound sa Kapitolyo.
Kini maoy gipahibawo ni Gobernador Gwendolyn Garcia ug iyang giklaro nga ang maong lakang wala magtumong nga makakuwarta ang Kapitolyo, apan aron mahunong na ang overnight parking sulod sa compound. Wala gisulti ni Garcia kon kanus-a magsugod ang pagpaningil sa pulta.
“It’s not really to earn, it’s really more to control because we’d like to prioritize those working here instead of making it a free-for-all parking lot,” matod ni Garcia atol sa usa ka news conference niadtong Miyerkules, Peb. 19, 2020.
Nahimutang ang Cebu Heritage Park ug ang parking area sa lugar diin tukoron unta ang 20 ka andana nga building nga proyekto ni kanhi gobernador ug karon Bise Gobernador Hilario Davide III, apan wala kini gipadayon ni Garcia.
Naobserbahan sa opisyal nga sukad sa pag-abli sa parking area, daghang mga motorista nga sagunson ang overnight parking sa ilang mga sakyanan.
“I’ve already instructed the engineering (office) and the PGSO (Provincial General Services Office) to please put up the proper barriers and set up a system. We will be charging for parking, the way it was before,” dugang ni Garcia.
Alang sa unang tulo ka oras nga parking, P20 ang mabayran sa mga motorista ug P10 alang sa mosunod nga matag oras. (RTF, KAL)