DRAYBER ug iyang uyab nitugpa sa balay tambalanan human nalambigit sa bangga sa flyover sa Archbishop Reyes Avenue, Cebu City.
Si PCmsgt.Juditho Dinglasa, traffic investigator sa Mabolo Police Station, niila nila nga si Vince Angelo Chavez, 19, nagpuyo sa lungsod sa Daanbantayan, ug Erica, 16, taga Bayanihan, Cebu City.
Matod ni Dinglasa nga base sa imbestigasyon, si Chavez padulong sa Banilad ug pag-abot sa flyover nabangga ngadto sa laing motor nga Mio tungod sa kakusog sa iyang dagan.
Ang drayber sa Mio giila nga si Medel Casinillo, 46, taga Banilad. Tungod sa kakusog sa padagan ni Chavez, miabot sa 24 metros ang pagkadaro sa iyang motor gikan sa pagkabangga sa Mio, matod ni Dinglasa.
“Kana gyud nga dagan wala man ko nakasinati sa gikusgon sa speed sa motor. Pero sa akong nakita dili haum ang pagpadagan sa drayber sa ingon ana nga gilapdon nga dalan,” pagpasabot ni Dinglasa.
Wala pa makuha ang lisensiya ni Chavez kon duna sanglit anaa pa kini sa ospital.
Matod ni Dinglasa, sutaon niya karong Martes kon si Chavez aduna bay driver’s license.
Gipaabot sa imbestigador si Casinillo, ang gibanggaan ni Chavez, nga motunga sa Mabolo Police sa iyang desisyon kalabot sa nahitabo. (BBT)