MAY bag-ong restawrant na sab nga nagbukas sa Norteng bahin ning siyudad sa Davao nga nagtanyag sa exciting nga pagkaong mopatakam kanimo.
Kung nainlab ka sa lamiang Pinoy foods sa Rekado, Golden Brown ug Patok sa Manok, for sure, sama sab niini ang imong bation sa mga gitanyag nga pagkaon sa Mr. & Mrs. B (MMB).
Kung ang ubang resto mopatilaw lang kanimo sa tipikal nga pagkaong "lutong bahay" sa MMB, daw gabiyahe ka sab abroad sa nagkadaiyang pagkaon nga ilang gitanyag.
Suma pa, matag pagkaon nga ilang giandam, inspired sa mga pagkaong na-enjoy sa pamilya Benedicto sa ilang biyahe abroad.
Si Chef Pauline Benedicto-Malilin, nga mao say mipakilig kanimo sa lamiang menu sa Rekado, nagrekomenda niining mosunod nga pagkaon.
Kung hilig nimo ang kinilaw, suwayi ang MMB's Tuna Carpaccio nga gama sa preskong tuna dinayanan sa olive oil, lemon, garlic, basil-capers dressing, sweet pickles ug arugula. Ug aron mas exciting, pakapinan pa's sili!
Anaa sab ang makasasalang Bone Marrow Butter.
Tilawi sab ang Cream of Mushroom Soup o Cheese and Onion Soup, nga pampasipa sa imong lamiang pagkaon.
Kung bet ang pagkaon from Italy, suwayi ang Shrimp Puttanesca.
Bida as always ang Grilled Pork Chop nga sama og nawong sa imong paboritong T-Bone steak.
I-andam ang daghang kan-on sa Grilled Tuna Belly nga giubanan sa dressing nga sesame aioli ug eggplant-parmesan puree.
Wa say mausik sa perfectly-cooked nga Roasted Half Herb-Chicken nga gilumsan sa nagkadaiyang herbs.
Ug sa mas lamiang food trip, ayaw kalimot sa Sous Vide Duck.
For sure, sa nagkadaiyang pagkaon nga giandam, daw sama sa gabiyahe na sab ka, nabusog pa ka!