DAVAO DEL SUR -- Gikonsidera sa Department of Agriculture (DA)-Davao nga 100 porsiyento nang nahuman ang pagpamatay sa mga baboy sa Davao del Sur ug silingang Davao Occidental.
Sumala ni Roel Provido, tigpamaba sa DA-Davao, atol sa pakighinabi sa telepono nga nahuman na ang pagpamatay sa mga baboy nga apektado sa African Swine fever (ASF) sa duha ka probinsiya.
Apil unta ang sa Davao City, apan nisulpot ang bag-ong problema sa ASF didto sa Barangay Inayangan sa Calinan District Miyerkules sa miaging semana, hinungdan nga adunay 900 ka mga baboy ang gipailawom sa "culling" sukad niadtong Dominggo, Pebrero 23.
Sa datos sa DA, gawas sa 16,062 ka mga baboy nga target sa depopulasyon, anaa na sa 15,945 ang mga nahuman, asoy ni Provido.
Sa maong datos, 6,624 ang naihaw na sa Don Marcelino, Malita -- 4,448, Jose Abad Santos -- 1,490, sa Davao Occidental ug Sulop, Davao del Sur -- 1,040 ug Davao City -- 2,343 wa pay labot niini ang Inayangan.
Si Provido nagklaro nga ubang baboy wa na maapil sa culling human nangamatay tungod sa ASF.
Nasayran nga nahuman na sab ang culling sa mga barangay sa Lamanan ug Domingga sa Calinan, apan bag-ong kaso sa ASF ang nahitabo sa Barangay Inayangan, nga anaa sa atbang nga bahin sa Lamanan.
Nanghinaut ang DA nga wa nay mag-positibo nga mga baboy sa ASF, hinungdan nga padayon silang mokuha og mga samples nga nasud sa 1-7-10 protocols.
Sa kasamtangan, padayong giawhag sa DA ang mga backyard hog raisers ug mga breeders nga di una magbuhi samtang wa pa hingpit nakontrola ang ASF.
Gipahugtan sab sa mga kalungsuran pinaagi sa lockdown ug quarantine checkpoint aron di makasud sa ilang lugar ang ubang baboy nga masayri ang tinubdan niini. (Orlando B. Dinoy)