ARAKAN, North Cotabato -- Patay ang mag-amahan nga sakay sa ilang multicab human masungag sa kotse nga gisakyan sa mga Indian nationals.
Nahitabo ang insidente alas 10:15 sa buntag, Dominggo, Pebrero 23, sa nahisgutang dapit.
Mga napatay mao sila Jonathan Nuevo ug ang amahan nga si Juan Nuevo, mga nagpuyo sa dakbayan sa Davao.
Matud ni Arakan Chief of Police Captain Gaspar Maguiwe nga mga biktima nga sakay sa multicab sa may Barangay Gambudes sa Arakan nimenor aron nga magpadaplin sa kalsada gumikan usa lang ka linya ang gigamit sa national highway gumikan dunay road construction aron nga tagaan unta og lugar ang kasugat nga dakong trak.
Apan ni-overtake sa trak ang kotse nga gisakyan sa lima ka Indian nationals nga gimaneho ni Akash Suresh nga nagpuyo sab sa Davao City, hinungdan nga nibangga sa multicab nga naghunong daplin sa kalsada.
Nahulog sa kanal daplin sa national highway ang multicab ug on the spot nga napatay ang mag-amahan nga naipit.
Samtang naangol sab ang laing duha ka paryente nila Nuevo nga sakay sa multicab ug ang 5 ka Indians.
Mga angol daling gihatud sa mga nagrespondeng pulis sa usa ka balay tambalanan sa Davao City.
Sa imbestigasyon sa Arakan Municipal Police Station, mga hubog ang mga Indian nationals base sa narekober nga botelya sa makahubog nga ilimnon sa ilang gisakyan nga kotse. (Edgar E. Fuerzas)