ORMOC City, Leyte - Laing pasidungog na usab ang nakuha sa dakbayan sa Ormoc nga gihatag gikan sa Department of Interior and Local Government (DILG).
Sa ikatulong higayon, nakuha na usab sa dakbayan ang Seal of Good Financial Housekeeping (GFH).
Si Mayor Richard Gomez nagpasalamat sa mga kawani sa City Hall nga mitabang sa iyang administrasyon nga mahapsay ang financial management sa siyudad.
Ang maayong koleksyon sa mga buhis ug padagan sa treasurer's office ang usa sa gitumbok nga rason sa maong award.
“That means maayo ang imong padagan sa treasurer office, maayo ang collections and maayo ang singil sa RPT (Real Property Tax),” matod ni Gomez. Sigon sa mayor nga istrikto usab ang siyudad kabahin sa gastohan sa matag departamento ug gigamit sa insakto ang budget.
Gitagaan usab og gibug-aton sa mayor nga walay mga kuwang nga dokumento ug dunay transparensiya.
Daghan pa nga awards ang buot makuha sa kagamhanan sama sa Galing Pook Award ug Kalasag Award.
Gitagaan usab og importansya ni Gomez ang paghatag og pagsalig sa department heads ug mga kawani.
“Kana ato department heads we asked them to work well. Nagtrabaho sila og maayo, nagtrabaho silag sakto, talagang nag-deliver sila. That is what is happening diri sa ato sa Ormoc,” dugang sa mayor.
Gawas sa Ormoc, nakakuha usab sa maong award ang lungsod sa kwatro distrito sama sa Kananga, Merida, Matag-ob, Palompon ug Isabel Leyte. (JKDP)