KAMPANYA batok sa illegal nga sugal sa Central Visayas hugot nga hingusgan sa kapulisan lakip na ang sugal sa haya sa patay nga misobra na sa kadaghan.
Matod ni P/Brig. Gen. Albert Ignatius Ferro, director sa Police Regional Office (PRO) 7, nga kon basahon ang Presidential Decree 1602, hugot nga gidili ang bisan unsa nga matang sa sugal nga walay pagtugot sa gobyerno.
Sama nianang gihimong sugal panahon sa mga haya sa patay nga daw gihimo nang pasugalan sa daghang mga tawo. Illegal kini, sigon sa balaod.
Motugot si Ferro kon usa lang ka set sa mga nagsugal sama nalang sa tong-its, mahjong ug uban pa nga makahatag og kalingawan sa mga mitambong sa haya.
“Pag isa siguro tolerable. Pag daghan na di na yan, sugal na talaga yan,” matod ni Ferro.
Dili siya estrikto bahin niini, matod niya, apan kinahanglan nga dili abusaran sa mga tawo ang PD 1602.
Gimandoan usab niya ang kapulisan nga dakpon ang mga tigbakayan sa kabarangayan matag Dominggo.
Mimando si PNP Chief Police General Archie Francisco Gamboa ngadto sa mga director sa nga hingusgan ang kampanya batok sa illegal numbers game sa ilang hurisdiksyon.
Kon adunay masuta nga wala makasumpo niini, mibahad ang Chief PNP nga iyang pahulipan sa katungdanan ang regional director.
Misaad si Ferro nga iyang gukdon ang illegal nga sugal ug mideklara og “no take policy.” Mibahad usab siya niadtong mga pulis nga mahibaw-an nga nagdawatan og payola gikan sa swertres ug masiao, nga maoy niuso sa Central Visayas, nga iya silang taktakon sa serbisyo.
Gukdon pud niya ang mga protektor og ilegal nga sugal lakip.
Giangkon niya ang illegal nga sugal nahimo nang tradisyon sa mga Pilipino ug problema na kini sukad pa kaniadto.
Wala siya mosaad nga puhagon kini sa labing dali nga panahon apan matod niya nga ang kapulisan sa Central Visayas maningkamot nga matubag ang maong problema pinaagi sa ilang walay hunong nga operasyon. (AYB)