SUPERBALITA CEBU

P10,000 bonus sa kada kawani sa Cebu City Hall

P100K: Duha ka konstituwente sa Cebu City nga nag-edad og kapin 100 anyos gipahalipayan og P100,000 kada usa atol sa 83rd Cebu City Charter Day Lunes, Pebrero 24, 2020 sa Plaza Sugbo. Gitunol ni Mayor Edgardo Labella ug Vice Mayor Michael Rama ang mga tseke ngadto sa centennarians. (Amper Campaña)

ANG Cebu City Government mohatag og tag P10,000 isip Charter Day bonus ngadto sa 5,400 ka mga casual ug regular employee sa City Hall.

Si Mayor Edgardo Labella maoy niduso sa Supplemental Budget (SB) number 1 ngadto sa Konseho. Ang total anniversary bonus moabot og P54 milyones.

Atol sa gipahigayon nga special session kagahapon, Pebrero 24, 2020, ang SB1 nga gipangayo ni Labella giduso ngadto sa City Council ngadto sa committee on budget and finance nga gipangulohan ni majority floor leader Raymond Garcia.

Si Garcia sa iyang bahin nagkanayon nga human sa referral, ang iyang committee mohimo og report nga maoy magsilbing basehan aron aprobahan ang pundo nga gipangayo ni Labella alang sa anniversary bonus.

Base sa Local Budget Circular no. 65 nga giisyu sa Department of Budget and Management (DBM) niadtong March 3, 1997, ang mga local government unit gitugotan nga makahatag og bonus matag lima ka tuig human sa 15 ka tuig nga pagkahimugso sa usa ka LGU.

“The anniversary bonus herein authorized shall be granted only during milestone years which refers to the 15th anniversary and to every fifth year thereafter of the founding of the LGU,” sigon sa local budget circular sa DBM nga tukma sa tuig 2020.

Giawhag ni Garcia si City Administrator Floro Casas Jr., sa pag-andam sa mga dokumento ug ubang papeles nga gikinahanglan alang sa pag-release sa maong kantidad human sa pag-aprub sa City Council.

Si Casas nagkanayon nga ang P54 milyones adto kuhaon sa savings sa dakbayan diin ang City Government adunay kapin o kulang P20 bilyones nga pundo sa banko. Lakip sa makadawat sa Charter Day bonus mao ang mayor, bise mayor, 18 ka konsehal, department heads ug ubang kawani lakip na ang naghupot og labing ubos nga regular ug casual position. (PAC)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph