WALA nay problemahon pa ang ginikanan sa pagpatambal sa 4-anyos nga anak nga si Arvy Niño, alang sa iyang sakit nga cancer sa mata.
Matod ni Girlie Veloso, project head sa Malasakit Center sa Cebu, “admitted na” ang bata aron kini matambalan.
Ang Malasakit Center usa ka one-stop shop diin ang mga pobre nga pasyente matagaan og kahigayunan nga matambalan sa usa ka pampublikong tambalanan. Dinhi sa Cebu, naka-tie up ang Malasakit Center sa Office of the Presidential Assistant for the Visayas (Opav).
Si Arvy Niño adunay cancer sa mata nga gitawag og Stage 4 Retinoblastoma. Sabado, Pebrero 22, 2020, gipa-admit si Arvy sa Vicente Sotto Memorial Medical Center (VSMMC) ug gitakda na ang chemotheraphy.
Gitabangan usab ang iyang pamilya sa ubang kinahanglan alang sa iyang pagpatambal.
“Will ensure that the family of the four- year old Arvy Niño from Barangay Tanke in Talisay City will not be paying for the treatment of her Stage 4 Retino Blastoma, a cancer that affects the retina of the eye,” matod sa Opav agi sa usa ka Facebook post.
Nabasahan ni Assistant Secretary Jonji Gonzales ang Facebook post ni Talisay City Mayor Gerald Anthony Gullas, sa pagpangayo og tabang alang ni Arvy Niño. Sa miaging semana, giduaw ni Gullas ang panimay ni Arvy Niño uban ang pangulo sa City Social Welfare Services diha sa Barangay Tanke.
Ang mga ginikanan ni Arvy nga silang Dyesebel ug Rodrigo nangayo og tabang ni Gullas sa chemotherapy sessions sa ilahang anak.
Aduna nay daku nga bukol sa wala nga mata ni Arvy nga ang gidak-on halos motabon na sa iyang nawong.
Ang Talisay City Hall nihatag na og pasiuna nga pinansyal nga hinabang sa pamilya.
Gihangyo usab ang City Social Welfare and Development Office nga motabang sa pag-abaga sa galastuhan sa chemo sessions ug ubang panginahanglanon sa pamilya.
“But to be honest, this is not enough. That is why I’m calling upon my friends here on FB to tell your friends, relatives and acquaintances to help us get the needed funds to complete Arvy’s chemo sessions. Even a small amount can go a long way in saving this little girl’s life,” tipik sa panawagan sa mayor diha sa iyang FB page.
Sa mando ni Opav Secretary Michael Dino, dali nga nakig-alayon ang Opav ngadto sa pamilyang Niño. “Our team from Opav is monitoring the status of Baby Arvy and we will make sure that all her hospital bills will be shouldered by Malasakit Center,” matod sa Opav.