SUPERBALITA CEBU

Covid-19 mikatap sa South Korea

BISAG wala pay gipahamtang nga travel ban, mipahimangno ang gobiyerno sa Pilipinas ngadto sa mga Filipino nga dili lang una mobiyahe ngadto sa South Korea gumikan sa nagkasaka nga mga kaso sa coronavirus disease 2019 (Covid-19) didto.

Ang Department of Foreign Affairs (DFA) mipagawas og pamahayag Dominggo, Peb. 23, 2020, nga ang embahada sa Pilipinas nakig-alayon na sa Filipino community sa South Korea.

Sa kasamtangan, wala pay Filipino sa South Korea nga nataptan sa Covid-19.

Ang DFA misulti sa mga Filipino nga motawag sa emergency hotline sa embahada sa Pilipinas sa Seoul (+82) 10-9263-8119. Ang mga Filipino nga makasinati sa simtuma sa Covid-19 kinahanglan magpatabang dayon sa Korea Center of Disease and Prevention sa numero 1339, matod sa DFA.

Pahimangno sundon

Midugang ang DFA nga ang tanang Filipino kinahanglan makahibawo ug mosunod sa pahimangno sa health officials sa South Korea.

Ang South Korea mitaho sa dako nga sulbong sa bag-ong mga kaso sa Coronavirus disease 2019 (Covid-19) Lunes, Peb. 24, 2020, usa ka adlaw human ang presidente nga si Moon Jae-in sa maong nasod nanawagan sa paghimo og mga lakang sa pagsumpo sa naasoyng sakit.

Ang 161 ka bag-ong kaso mipasaka sa kinatibuk-ang kaso sa South Korea ngadto sa 763, ug pito na ang nangamatay.

Nagkanayon si Moon niadtong Dominggo nga ilang gobiyerno mipasaka sa anti-virus alert level ngadto sa “Red,” ang kinatas-an nga level. Matod niya, ang mosunod nga mga adlaw kritikal nga bahin sa pagpakgang sa pagkuyanap sa sakit.

Milan, Italy

Sa amihanang rehiyon sa Italy diin nahimutang ang financial capital niini, Milan, ang gobernador mipahibawo nga ang kumpirmadong kaso nagpabilin sa 110.

Sa kinatibuk-an, ang Italy aduna nay 150 ka kaso, ang labing dako gawas sa Asya, ug lakip na ang tulo ka tawo nga namatay.

Daghang Overseas Filipino Workers (OFWs) sa South Korea ug Italy.

Matod sa DFA, kapin 66,000 nagpuyo ug nagtrabaho sa South Korea samtang kapin 100,000 ka dokumentado nga mga Filipino ang nagpuyo o nagtrabaho sa Italy.

China

Ang China mitaho pod Lunes, Peb. 24, og bag-ong 409 ka kaso. Misaka ang mga kaso sa Covid-19 ngadto sa 77,150.

Aduna poy 150 ka tawo nga bag-ong nangamatay tungod sa Covid-19 nga nagsugod sa Wuhan, siyudad sa Hubei diin nagsugod ang pagkatap sa Covid-19 niadtong Disyembre.

Sa kinatibuk-an, 2,592 na ka tawo ang nangamatay sa mainland China.

Ang pagtuyhakaw sa bag-ong mga kaso sa Covid-19 gawas sa mainland China nakahatag og kahingawa nga ang pagkuyanap sa sakit lisod na kontrolahon.

Pagsaka paspas

Gawas sa China, natala ang daghang kaso sa Covid-19 sa Japan (kapin 800) ug South Korea, ug ang mga bag-ong kaso paspas nanaghan sa Italy ug Iran sulod lang sa pipila ka adlaw.

Kasagaran sa mga kaso sa Japan nagagikan sa Diamond Princess, usa ka cruise ship, diin kapin 800 sa 3,711 ka pasahero ug crew ang nataptan sa Covid-19.

Sa 538 ka Filipino sakay sa Diamond Princess, 59 nila ang naigo sa sakit, matod ni Health Assistant Secretary Maria Rosario Vergeire Lunes, Peb. 24.

Ang kinatibuk-ang resulta sa test ipagawas sa Department of Health Miyerkules, Peb. 25.

Sa susamang adlaw ilupad pabalik ang mga Filipino balik sa Pilipinas diin ipaubos sila sa 14 ka adlaw nga quarantine sa New Clark City sa Capas, Tarlac.

Sa Pilipinas, adunay tulo ka kunpirmadong kaso sa Covid-19 ug usa ka natalang patay, samtang kapin sa 100 ka pasyente ang gipaubos og imbestigasyon. (LMY & AP, KAL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph