GIMUGNA ni LeBron James sa 4th quarter ang 13 sa iyang kinatibuk-ang 33 puntos aron pangulohan ang pagbangon sa Cleveland Cavaliers gikan sa pagkalubong ug pakagingon ang Washington Wizards, 119-115, kagahapon sa National Basketball Association.
Ang kadaugan usa ka nindot nga pagsugat kang coach Tyronne Lue gikan mao pa’y pagbalik gikan sa siyam ka mga duwa nga wala siya nakagiya sa Cavaliers gumikan kay nagpaalim kini sa iyang sakit.
Ang Cavaliers naggukod og dobleng numero nga puntos, 87-104, sa nahabiling 7:35 minutos ug niadtong higayuna, nakadesisyon na si James nga kinahanglan na niyang ipagawas ang abilidad nga nagpahimo kaniyang kanhi 4-time MVP.
Human niya giagak ang iyang mga kauban sa nag-unang tulo ka quarters, si James, kinsa nakahimo sab og 14 assists ug siyam ka rebounds, mas miagresibo ug daw nag-inusara na kining sundalo nga nakigbatok sa Wizards.
Tuod man, sunodsunod nga puntos ang namugna ni James.
“I don’t have a quit bone in me, so if I’m on the floor I’ve got to try to make plays happen no matter what the score is,” matod ni James. Ning panahuna nga malantaw na ang pultahan sa playoffs, ang Cavaliers nagpabilin sa ikatulong dapit sa Eastern Conference dala ang 49-30 nga rekord samtang nagpabilin sab sa ikapitong luna ang Wizards sa East bitbit ang 42-37 nga baraha.
Ang Cavaliers, nga ningposte sa ikalima nilang sunodsunod nga kadaugan, nakadawat sab og 21 puntos gikan kang Jeff Green ug 16 puntos gikan kang Kevin Love.
Si Wizards caoch Scott Brooks igo na lang sa pagdayeg kang James.
“He’s the best player in the league and he does that every night. You don’t get to see players like him often, matod ni Brooks.
Ang Wizards gipangulohan ni John Wall pinaagi sa iyang 28 puntos ug 14 rebounds.
Ang Indiana Pacers batok sa defending champions Golden State Warriors, 126-106, Brooklyn Nets batok Milwaukee Bucks, 119-111, Houston Rockets batok Portland, 96-94, Utah Jazz batok L.A. Clippers, 117-95, ug Denver Nuggets batok Minnesota Timberwolves, 100-96. (AP, ESL)