Migallen: Santisima ug Cebu basketball

WA MAN tuod nako isalikway ang gamayng kahigayonan sa kadaugan ni Jeo Santisima batok sa Mexicanong si Emanuel Navarrete sa ilang WBO junior featherweight world title fight niadtong Dominggo didto sa Las Vegas, Nevada, apan mipasuabi gyud ang akong panglantaw sa dominasyon sa Mexican fighter.

Tuod man na-knockout gyud si Santisima sa maong away, pero wa ko magdahom nga makahatag ba diay og saktong kombati ang lumad nga taga Aroroy, Masbate una pa mapa-undang sa ika-11 nga round.

Pildi siya sa away, apan ang iyang gipakitang kalig-on nga miabot pa siya og hataas nga mga round, posibling maoy mag-abli og dugang pang mga dagkong sa US.

Dihay round nga nasagunto na unta ug napaatras niya si Navarrete samtang nakasandig kini sa pisi, apan ambot og nganong wala niya mapadayon ang pag-pressure niini.

Hinuon masabot nga anaa na usab siya sa kakutas niadtong higayona. Di usab nato isalikway nga tingali ang kakuwang sa exposure ug kasinatian sa mga dagkong away ilabi na niadto nga world title fight nakatampo og dako sa iyang kapildihan.

Lisod tuohan nga kadto maoy una palang away ni Santisima gawas sa US ug mao usab ang una niyang world title fight, apan napakita niya ang saktong katakos.

Kon tapad ug eksperiyensiya ang hisgutan, way departamento nga gidag-an si Santisima.

Lupig siya sa gidak-on ug gitas-on, halayo ra usab siya sa experience kay tiaw mo bay si Navarrere adunay record nga 31-1, 27 KOs samtang ang iya 19-3, 16KOs.

Bisan gani si Navarrete, sa interview, midayeg sa kalig-on ni Santisima tungod kay nakasugakod kini sa iyang mga kinumo bisan tuod og permi niya kining maantimano og kaigo.

Nagtuo si Navarrete nga sayo niyang ma-knockout si Santisima apan wa kini niya mahimo.

Sa laktod nga pagkasulti, way angay ikauwaw si Santisima sa iyang kapildihan kay iya man’g napakita ang saktong labok ug didto usab naplastada ang iyang kapabilidad sa kalibutan sa boxing.

Hinaot nga taliwala sa maong kapilidihan, adunay dakong leksiyon nga nakat-onan si Santisima nga maoy magamit kaniya sa umaabot pang mga dagkong away.

Keep up the good work, Jeo.

•••

Uyon ko sa obserbasyon sa atong kauban sa buhat nga si Rico Navarro nga hinayhinay nang nahibalik ang commmercial basketball dinhi sa Sugbo.

Kini tungod niining sunodsunod nga mga liga nga napahigayon sa dakbayan sa Sugbo ug ingon man sa pipila ka kalungsoran.

Dili pa lang dugay, ang buhatan ni Cebu City Mayor Edgar Labella ug inabagan sa Cebu City Sports Commission (CCSC) ang nakapahigayon na og Mayor Labella’s Cup niadtong Disyembre 2019.

Migintang lang og usa ka buwan, mipahigayon na usab sila og Cebu City Charter Cup. Ang torneyo pulos gilangkuban sa pipila ka mga inilang local commercial teams sa Sugbo.

Usa sa atong tinubdan ang mibutyag nga aduna pa unyay umaabot nga dakong liga sa basketball nga pasiugdahan gihapon sa Cebu City Sports Commission.

Kining atong gipanghisgutan sa unahan, maoy tipik o anino nga obserbasyon ni Rico.

It’s about time na nga buhion og balik ang commercial league sa Sugbo - sama niadtong Cebu Basketball League (CBL), Mandaue Industrial and Commercial Athletic Association (MICAA) ug uban pa.

Ug ang panaghugpong sa team owners maoy magsilbing yawe sa katumanan. Common guys! (jun.migallen22@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph