HAPIT na miabot sa saktong kondisyon ang Cebu City track and field athletes alang sa ilang kampanya sa Central Visayas Regional Athletic Association (Cviraa) Meet nga gikatakda karong Marso 15-21 sa Dumaguete City.
Ang many-time reigning champion Cebu City Niños mosalig og maayo sa medal-rich track and field alang sa ilang tinguha nga maangkon og balik ang overall championship sa elementary ug secondary sporting conclave.
“We are about 85 percent ready,” matod ni track and field coach Arvin Loberanis, kinsa maoy mogiya sa girls’ secondary team sa Cebu City.
Ang Niños mokampanya sa sprint, long distance, middle distance, hurdles, jumping ug throwing.
Ang CVIRAA orihinal nga gikatakda sa Pebrero 22-29 apan nauswag kini gumikan sa hulga sa coronavirus disease 2019 (Covid-19) outbreak.
Ang ubang sporting events nga kombatihan mao ang archery, arnis, badminton, billiards, baseball, basketball, 3-on-3 basketball, boxing, chess, football, futsal, sepak takraw, softball, swimming, tennis, table tennis, taekwondo, volleyball, wrestling, wushu, pencak silat, gymnastics, aero gymnastics ug dancesport.
Ang ubang mga partisipante mao ang mga dakbayan sa Lapu-Lapu, Dumageute, Tagbilaran, Mandaue, Danao, Bayawan, Talisay, Bogo, Toledo, Bais, Siquijor, Guihulngan, Carcar, Tanjay ug City of Naga, ingon man Cebu Province. (RSC, ESL)