GISUGDAN sa Gilas Pilipinas ang ilang kampanya sa Fiba Asia Cup 2021 qualifiers pinaagi sa paglampornas sa host Indonesia, 100-70, niadtong Dominggo sa gabii, Pebrero 23, 2020 sa Britama Arena sa Jakarta.
Gipangulohan ni Thirdy Ravena ang pagratsada sa Gilas Pilipinas, nga gilangkuban og mga magduduwa sa amateur rank ug Philippine Basketball Association (PBA).
Si Ravena nagpakatap og 23 puntos alang sa Gilas Pilipinas, nidugang og 16 puntos ang Sugboanong si Roger Pogoy, nihatag og 11 puntos si CJ Perez samtang niamot og 10 puntos ang maguwang ni Ravena nga si Kiefer.
Sikit ang kombati sa 1st half apan pagsugod sa 3rd quarter, ningbulhot na ang opensa sa Gilas Pilipinas hangtod nga ilang nakontrolado na nila ang kombati.
Gisugdan sa Gilas Pilipinas ang 3rd quarter pinaagi sa 12-0 run nga gidugkatan ni Thirdy.
Ang maong pagbulhot sa opensa sa Gilas Pilipinas mao ang nakahatag kanila og 67-51 nga labaw sa ulahing bahin sa 3rd quarter.
Nagpadayon ang kabangis sa Gilas Pilipinas sa 4th quarter hangtod nga nalubong na nila nga buhi ang Indonesians.
Puntos matag usa:
Philippines (100) – T. Ravena 23, Pogoy 16, Perez 11, K. Ravena 10, Gomez de Liano 10, Rosario 7, Chua 6, Ramos 5, Tratter 5, Erram 5, Nieto 2
Indonesia (70) – Dhyaksa 28, Grahita 17, Wicaksono 6, Lakudu 5, Gemilang 4, Kosasih 4, Wisnu 4, Sitorus 2. (ESL)