GAMIT ang ilang teamwork, ang host San Miguel Alab Pilipinas ningmakmak sa Saigon Heat sa Vietnam, 99-79, niadtong Dominggo sa gabii, Pebrero 23, 2020 sa Asean Basketball League sa Sta. Rosa Multi-Purpose Complex sa Sta. Cruz. Laguna.
Nahimo kini sa Alab Pilipinas bisan wala gihapon nakaduwa ang ilang import nga si Justine Brownlee.
Gipangulohan ni Sam Deguara ang kadaugan sa Alab Pilipinas pinaagi sa iyang 23 puntos, nidugang og 20 puntos si Nick King samtang nihatag og 18 puntos si Lo Domingo.
Kini maoy ikaduhang higayon nga wala nakaduwa si Brownlee alang sa Alab Pilipinas. Wala pa masayri kon nganong wala miduwa si Brownlee. (ESL)