HUGOT nga nagpasidaan karon ang pamunuan sa 39th Infantry Battalion (IB) ug 10th Infantry Division (ID) ngadto sa mga politikong mosud sa balwarte sa rebeldeng New People's Army (NPA) nga di magpada sa huraw niini.
Sumala sa 39th IB nga di gyud angay nga mohatag ang si bisan kinsang politiko og revolutionary tax ngadto sa mga NPA.
Si Lieutenant Colonel Lyndon Panisa, 39th IB commanding officer, nikanayon di gyud angay magpahuraw ang mga kandidato sa bahad sa mga rebelde nga di mamahimong mangampanya sa ilang mga teritoryo ugaling di mobayad og permit to campaign.
Di buot ang kasundaluhan nga makasapi ang mga NPA sa piliay karong Mayo.
Dungan niini, gisugdan na sab sa militar ang pagpataas sa seguridad lukop lalawigan sanglit nagkaduol ang kasumaran sa pagkahimugso sa rebeldeng grupo karong Marso 29.
Gipakusgan sab sa kasundaluhan ang ilang intelligence monitoring palibot sa kabukiran aron di makapaduol ang mga NPA sa mga vital installations nga posibleng dauton niini ug uban pang opensiba nga ilang himuon kabahin sa pagsaulog sa ilang adlaw aron aduna sila'y ikapasigarbo sa umaabot.
Gi-aghat sab sa militar ang gi-organisa nga Barangay Defense System (BDS) nga mo-ayuda kanila pinaagi sa pagpaniid sa mga dapit nga ilang nahimutangan aron sayon kaayong matiktikan ugaling anaa ang presensya sa mga rebelde.
Si Lieutenant Raul Villegas, civil military operations officer sa 39th IB, nikanayon nga aduna nay kapin kun kulang 40 mil ka mga miyembro ang BDS dinhi sa lalawigan.
Alang nila, dako kaayo og gikatabang ang BDS sa ilang operasyon sanglit kini maoy nahimong kaabag nila sa paghatag og impormasyon aron di makapaduol ang mga rebelde sa sentrong bahin sa matag lungsod. (Dondon Dinoy)