MIDUGOK ang libuang tawo, Lunes, oras sa Estados Unidos, sa gihimong memorial service alang nila Kobe ug Gianna Bryant nga namatay sa helicopter crash pila ka semana na ang nakalabay.

Naghilak nga miatubang sa tawo ang biyudang si Vanessa, gidayeg ang bana ug anak nga 13 anyos, atubangan sa bagang duot sa mga fans nga midagsa sa Staples Center.

"God knew they couldn't be on this Earth without each other," ni Vanessa. "He had to bring them home to have them together. Babe, you take care of our Gigi."

Ang seremonya gisugdan sa performance ni Beyonce nga mikanta sa "XO" ug "Halo."

Mihatag sab og performance si Alicia Keys sa Beethoven's "Moonlight Sonata."

Human gi-welcome ni Jimmy Kimmel ang midugok, si Vanessa mihinumdum sa kapikas ug mga anak.

"He was the most amazing husband. Kobe loved me more than I could ever express or put into words. I was fire. He was ice. Vice versa at times. ... He was my everything."

Nakigduyog sab sa kasub-anan sila Lakers players Jerry West, Kareem Abdul-Jabbar, Magic Johnson ug Pau Gasol.

Anaa sab sila NBA Commissioner Adam Silver, Michael Jordan, Phil Jackson mga NBA players, sama nila Stephen Curry, Kyrie Irving ug Los Angeles natives James Harden, Russell Westbrook ug DeMar DeRozan.

Anaa sab ang celebrities sama nila Kanye West, Kim Kardashian, Jennifer Lopez ug Alex Rodriguez.

Sa pikas bahin, gikasuhan sab ni Vanessa ang nanag-iya sa helicopter nga nahagsa sa nakalabay nga bulan.

Ang kwarta nga gikita sa pagpamaligya og tiket ihatag sa Mamba ug Mambacita Sports Foundation nga nagsuporta sa youth sports programs sa komunidad nga kuwang sa katakus ug nagtudlo sa mga babaye ug kababaihan sa isports.

Usa ka pribadong lubong ang gihimo alang nila Kobe ug Gianna Bryant sa Orange County, Pebrero 7 ning tuig. (Uban ang AP)