MOKANTIDAD sa P32.2 milyon nga cash assistance ang naaprobahan karon sa konseho sa Davao City alang sa mga hog raisers nga naapektuhan sa African Swine Fever (ASF) sa mga barangay sa Calinan District.
Ayuda kini nga madawat sa mosunod nga mga semana ug giingong abagan pod kini sa Department of Agriculture (DA) aron makabangon gikan sa pagkalugi ang mga namuhi og baboy.
Human sa pagpatay sa 900 ka mga baboy sa Davao City, buot karon sa mga hog raisers nga tabangan gayod sila sa gobyerno, gawas niining ilang mga madawat nga ayuda.
"After they turned over their swine, we will give them the money. The instruction of Mayor Sara (Duterte) is to immediately release the money so that the farmers can use it," sumala ni Dr. Cerelyn Pinili, head sa City Veterinarian's Office (CVO).
Maayo unta pagkahuman sa pagpatay sa 900 ka mga baboy mohimo ang kagamhanan og hinanali ug mas epektibo kaayo nga aksyon aron dili na makakanit ang ASF sa ubang mga lugar sa rehiyon.
Hinuon naa ma'y gihimo nga lakang ang kagamhanan, apan ang pangutana ngari, mabalik ba ang pagpamuhi og baboy sa mosunod nga mga tuig?
Kini ang maayong tubagon sa CVO ug DA kay sila man ang mohatag og signal kung puwede na ba makabalik og pamuli, di hinuon karon apan sa mosunod nga mga panahon.
Gipaneguro kini tungod kay kung saligan lang ang ayuda sa gobyerno, di gyud bastante, kulangon gayod, lahi ra kung dunay mga binuhi nga kahayopan kay bisan unsang orasa, maoy makahupay sa panginahanglan.