USA ka estudyanye sa kolehiyo ang gikustodiya sa Sasa Police Station human nakuhaan og pinaugang dahon sa marijuana samtang pasakay na unta sa barge padung sa Island Garden City of Samal (Igacos) alas 10:20 kagahapon sa buntag didto sa Sasa Wharf ferry terminal.
Giingon ni Police Major Jerome de Guzman, hepe sa Sasa Police Station, nga giandam na nila ang kasong kalapasan sa Republic Act 9165, kun Comprehensive Dangerous Drugs Act of 2002, batok sa suspek (gipatago una ang pangalan), 20 anyos, estudyante sa kolehiyo ug taga Catalunan Grande, Davao City.
Sumala pa nga girekisa sa mga personahe sa Task Force Davao ang motorsiklo nga gisakyan sa suspek diin nakuha sa posisyon niini nga gisuksok sa parte sa iyang lawas gikan sa iyang bag ang usa ka pouch nga dunay gituohang duha ka pakite sa pinaugang dahon sa marijuana.
Sa spot report sa kapulisan, nasayran nga motimbang sa 7 gramos ang marijuana nga dunay street value nga P10,500.
Resulta suma pa kini sa gipakusgan nga kampanya sa kapulisan ug sa kasundalohan sa pagbatok sa gidili nga druga.
Ning kasamtangan, ang suspek gikustodiya sa Sasa police. (Jeepy P. Compio)