ISLAND GARDEN CITY OF SAMAL -- Aron dili mabilin sa outpost sa kapulisan ug kasundalohan ang mga karne nga hilaw, na-proseso ug bisan mga litson sa pagsulod sa Samal Island, mas maayong di na lang magdala.
Kini ang hangyo sa kapulisan sa Igacos Police Station aron dili mawad-an og sud-an pag-abot sa isla kung kini mangaligo.
Sumala ni Police Major Romeo Mapanao, officer-in-charge sa Igacos police, nga mas maayong didto na lang mamalit og karne sud sa isla kay luwas na kini sa African Swine Fever (ASF).
"Ang mas maayo, dili na lang magdala og karne para dili masayang. Diri na lang mo palit sa Samal kay ASF-free na ang mga karne diri," ingon ni Mapanao sa pakighinabi sa Superbalita Davao kagahapon, Pebrero 25.
Gipahugtan na sab ang pag-monitor sa City Veterinarian's Office sa Samal ngadto sa mga karne, naproseso nga karne ug mga livestock nga mosulod sa isla ingon man ang mga binuhing baboy sa mga hog raisers.
Gipaneguro sab sa lokal nga kagamhanan sa Samal nga di kasulod sa isla ang ASF luyo sa pagkatag niini nga balatian sa mga baboy sa Davao Region.