SA DIHANG nakadawat kog report nga dunay person under investigation (PUI) sa coronavirus sa Siyudad sa Sugbo gikan sa kasaligang tinubdan, akong gi-post sa akong FB account ang mga impormasyon nga akong nadawat.
Akong gituyo kon unsay reaksyon ug tagaan ba og pagtagad sa kadagkoan sa Department of Health (DOH) ug Cebu City Government kay kumbinsido man ko nga tinuod ang report nga akong nadawat nga dunay PUI sa usa ka condo unit nga sakop sa Barangay Apas, ug ang tibuok floor gi-cordon ug ang ubang mga tenant mahadlok na mogawas.
Gani, daghang milatos sa hingtungdang ahensya sama DOH ug City officials nganong wa magpahibawo ug gitago ang kasayuran. Apan dunay milaban usa ka reporter sa pikas mantalaan nga ang akong gihimo igo lang “paukyab.”
Karon gikompirmar man sa usa ka konsehal sa barangay nga tinuod ang akong gi-post sa FB ug naa na gani sa pribadong ospital ang pasyente human nagpada og notice ang taga City Health.
Di maayo nga itago sa katawhan ang tinuod nga mga panghitabo sa kaso sa Covid-19. Palapdan pa nato ang pagpangandam.
Cuenco nagpakabana sa pedestrian
Para nako dalaygon ang tinguha ni Konsehal Antonio Cuenco, south district sa Dakbayan sa Sugbo nga ayuhon ang napapas nga pedestrian lanes.
Kon hingpit na unya nga mapasar ang giplanuhan ni Cuenco nga ordinansa sa pag-ayo aron maklaro ug mabutang ang bag-ong pintal sa pedestrian lanes, mahimo na unya kining hapsay. Kay nabantayan ni Cuenco usa kini sa mga hinungdan ang katawhan magpasagad nalang og tabok sa karsada nga moresulta sa aksidente.
Nindot ni kay daghan sab sa mga motorista ang di motahud sa pedestrian lanes ug kusog gihapon mopadagan sa ilang mga sakyanan bisag naay molabang.
Gusto sab sa kanhi kongresista nga klaruhon sa Cebu City Transportation Office (CCTO) ang tukma nga loading ug unloading areas sa jeepneys ug buses aron ang drivers di magpasagad og hunong sa ilang mga sakyanan ug kalikayan ang disgrasya. (efrenlonzon71@gmail.com / 09235562777)