ORMOC City, Leyte - Gidayeg sa kadagkoan sa Department of Environment and Natural Resources (DENR) ug National Solid Waste Management Commission (NSWMC) ang 10-year Solid Waste Management Plan (SWMP) sa Ormoc City.
Nangunay si Mayor Richard Gomez sa pagpresentar sa plano uban sa taga City Environment and Natural Resources.
Gipakita ni Gomez ang mga target ug budget allocation sa maong plano sama sa pagsira sa kasamtangan nga sanitary landfill ug pag-abli og bag-o.
“Yung ibang lugar kasi porke may tatapunan sila, okay lang kung tapon ng tapon. You can see the consciousness if this city na kahit may pagtatapunan ka, gusto pa rin nila i-prolong ang buhay ng facility,” matod ni Crispian Lao sa NSWMC.
Matod sa mayor, ipasira nila ang kasamtangan nga 1.8 hektarya nga landfill ug ablihan karong tuiga ang bag-o nga tulo ka hektarya nga landfill.
Gitan-aw ni Gomez nga daghang basura ang makolekta sa umaabot gumikan sa pagsaka sa populasyon sa siyudad ug daghang mga establisemento.
Gitan-aw nga sa 2029, ang Daily Waste Generation moabot na sa 197,708.10 kilos, diin 41.08 porsiyento gikan sa Biodegradable Waste; 28 porsiyento gikan sa Recyclable Waste; 29 porsiyento gikan sa residual waste ug dos porsiyento gikan sa special waste.
Gani, gipahugtan karon ang pagpatuman sa Ecological Waste Management Ordinance aron maibanan ang gidaghanon sa mga basura nga makolekta sama sa dili paggamit og plastic sa Miyerkules ug Sabado.
Apil niini ang pag-isyu og citation ticket niadtong mga tawo nga magpasagad og labay sa basura, magpagawas sa basura bisan dili adlaw sa koleksyon ug ang pagdaob.
Lakip sa 10-year plan ang road repairs ug resurfacing, hazardous waste facility, health waste facility, pagpalit og dugang container vans ug dump trucks, repair and maintenance, manpower ug daily operations.
“Maayos yung plano nila. I think it’s one of the comprehensive plans that we have seen. The plans kasi has to have targets and budgets, so, it’s all there,” dugang ni Lao. (JKDP)