DUL-AN 1,000 ka mga pamilya gikan sa mga dakbayan sa Sugbo ug Mandaue ang gihatagan og ayuda gikan sa regional agencies atol sa pagbisita ni Senator Bong Go kagahapon, Pebrero 25.
Si Go, kauban si Secretary Michael Dino, Mayor Edgardo Labella, ug Bise Mayor Michael Rama maoy niabi-abi sa mga nasunogan gikan sa mga barangay Kasambagan, T. Padilla, Duljo Fatima ug Luz didto sa Barangay Mabolo aron mahatagan sila og ayuda.
Ang 576 ka pamilya sa upat ka barangay kon 1,949 ka individuals kinsa nabiktima sa sunog niadtong buwan sa Enero nakadawat og hinabang gikan sa Department of Social Welfare and Services, Department of Trade and Industry, National Housing Authority.
Sa Cebu City, ang DSWD nakagasto na og P2.8 milyones diin ang matag pamilya gihatagan og P5,000 gikan sa crisis intervention section aron ilang gastuon sa laing gikinahanglan sa pamilya ug laing P1.1 milyones alang sa food packs ug non-food items sama sa cooking kit, sleeping kit, dining kit, kitchen kit ug uban pa.
Ang mga nasunogan sa Cebu City nakadawat sab sila og P20,000 nga livelihood assistance gikan sa City Hall ubos sa liderato ni Labella.
Human sa distribution, ang convoy ni Go, Dino miadto usab sa dakbayan sa Mandaue aron hatagan usab ang laing 358 ka mga pamilya nga nasunogan sa mga barangay Centro ug Tabok. Miapas usab dayon si Mayor Jonas Cortes ug Cebu Governor Gwendolyn Garcia.
Sa Mandaue, ang DSWD nigasto og P2.7 milyones nga balor sa hinabang ug gi-distribute ngadto sa mga apektadong pamilya ug sama sa Cebu City nakadawat sab sila og tag P5,000.
Ang National Housing Authority (NHA) mohatag usab og P30,000 alang sa housing materials sa duha sa local government unit. Si Go nihatag usab og kaugalingon nga financial assistance nga maoy kanunay niyang gibuhat sa mga nasunogan dili lang sa dakbayan kon dili sa tibuok nasod. (PAC)