BUOT ni Gobernador Gwendolyn Garcia nga kumpletohon sa Department of Energy (DOE) ang pag-sumiter sa detalyado nga financial statement, ilabi na ang operating cost ug kita sa oil extraction nga proyekto niini diha sa lungsod sa Alegria sa 2018 ug 2019.
Atol sa gihimong pakigtagbo ni Garcia sa mga opisyal sa DOE niadtong Pebrero 19, 2020, nasuta nga nakadawat lang og moabot P100,000 ang lungsod sa kinatibuk-an nga P600,000 nga bahin sa DOE.
“I asked them give me the submitted nga work plan for 2018. The estimated operated expenses for 2018 by the contractor or by CIMP, and give me the total gross proceeds of 2018. Was there any possibility beyond that unsa may mahitabo kung na totally reimbursed na on the tenth month, so what happens on the 11th and 12th month in years time. They do not have answers for that,” matod ni Garcia.
Sa 2018, milagda og joint declaration of commerciality ang DOE ug ang China International Mining Petroleum Company Limited (CIMP) sa nahisgutan nga lungsod.
Gilaraw sa kompaniya nga molungtad hangtod sa 2037 ang reserba sa lana ug natural gas sa maong lugar.
Si Mayor Verna Magallon, atol sa maong kasabotan, nagkanayon nga ang maong proyekto makahatag og additional income sa lungsod ug sa lalawigan sa Sugbo.
Laraw ni Magallon nga ang tipik unya sa ilang bahin gamiton sa laing proyekto bahin sa paghatag og igong supply sa tubig alang sa mga molupyo sa lungsod.
Gawas sa tubig, lakip usab ang pagtaod og kuryente sa remote areas, health care services pinaagi sa pagpang-apud-apod og mga libre nga tambal, ug cash assistance sa mga senior citizen ug persons with disability (PWD).
Ang 18 porsyento niini padulong sa panudlanan sa Alegria, 14 porsyento adto sa barangay nga maoy giukopahan sa oil field nga mao ang Barangay Montpeller samtang otso porsyento mapunta sa lalawigan sa Sugbo.
"Kung dunay klaro nga work plan submitted, duna gyud na kay operating expense is defined in the contract. Unsa ra’y na covered ana, so duna gyud na sila’y estimate kung pila ang ilang projected operation expenses for that entire year, so kada dunay halin kuhaan dayon na og 70% goes to reimbursement of the operating expenses unya katong 30% mao nalang to ang bahinon,” pasabot ni Garcia.
Mipasalig ang DOE nga mobalik kini sa Kapitolyo aron ipakita ang pinal nga plano niini sa uwahing semana sa Pebrero o unang semana sa Marso. (ANV)