MAMAHIMO nang makapahimulos ang mga residente sa dakbayan sa Mandaue ug ingon man ang mga kasikbit nga mga lungsod niini sa Malasakit Center.
Kini tungod kay atol sa adlaw sa People Power Anniversary kagahapon, Pebrero 25, gibuksan na ang Malasakit Center sa Eversley Childs Sanitarium and General Hospital (ECSGH).
Mao kini ang ikaduhang Malasakit Center sa Sugbo. Ang una diha gibutang sa Vicente Sotto Memorial Medical Center niadtong Pebrero 12, 2018.
Ang Malasakit Center sa ECSGH mao ang ika-66 nga Malasakit Center sa tibuok nasod.
Si Go, inubanan ni Presidential Assistant for the Visayas Secretary Michael Lloyd Dino, nitunol usab og P5 milyones nga pasiunang Malasakit fund sa maong tambalanan.
Ang Malasakit Center, usa kini ka one-stop shop sa government agencies diin mamahimo magpatabang ang mga kabus o kadtong dili maka-afford sa bayranan sa hospital. Hinuon, kadto lang mga pasyente nga na-admit sa tambalanan nga adunay Malasakit Center ang makapahimulos niini.
Si Pythagoras Zerna, ang medical chief sa ECSGH, nagkanayon nga dako ni’g tabang ang pag-abli sa Malasakit Center hilabi na kadtong nanginahanglan og medical assistance.
Ang Malasakit Center sa Eversley anaa mahimutang sa ground floor sa Outpatient Department (OPD) Building diin anaa ang ahensya sa Philippine Health Insurance Corp., (Philhealth), Department of Social Welfare and Development (DSWD), Philippine Charity Sweepstakes Office (PCSO) ug Philippine Amusement and Gaming Corp. (Pagcor).
Gawas sa Malasakit Center gilusad usab sa maong tambalanan ang newborn screening facility diin mamahimo na nga mahibaw-an ang mga sakit nga nakuha sa bata gikan sa iyang mga kadugo. (HBL)