SI MAYOR Edgardo Labella nitunol og 17 ka Mayor’s special awards ngadto sa mga institution ug mga tawo nga adunay dako nga gikatampo sa dakbayan.
Lakip sa gipasidunggan ang tulo ka kanhi mga police official nga kontrobersyal ug gipasanginlang nagpaluyo sa paghasi sa political leaders sa kaatbang ni Labella samtang nag-angat ang 2019 elections.
Ang mayor nihatag og plaque of recognition ngadto sa high ranking police officials nga gipangulohan ni Police Major General Debold Sinas, Police Brig. Gen. Valeriano De Leon, retired Police Brig. General Royina Garma, ug Police Major Chuck Barandog ingon man sila si shipping magnate Chester Cokaliong, magpapatigayon Benjamin Sun, Sr., Kenneth Cobonpue ug Secretary Michael Dino.
Sa panahon nila ni Sinas, Garma ug Barandog, gipasanginlan ni kanhi mayor Tomas Osmeña ang kapulisan nga nang-harass sa iyang political supporters sa kabukiran.
Mga balay sa mga kapitan sa kabukiran sa Cebu City nga kaalyado ni Osmeña gipangrakrakan.
Gihulagway kini ni Osmeña nga political harassment.
Napatay usab sa grupo ni Barandog ang usa ka magtiayon ug barangay tanod sa Lusaran nga giingong armado.
Si Barandog nanghimakak sa mga pasangil nga mga pulis ang nagpaluyo sa mga straffing sa kabukiran.
Giawhag usab nila ni Sinas ug Garma si Osmeña sa pagpakigtambayayong sa mayor alang sa imbestigasyon, apan wa ma magpakabana ang kanhi mayor tungod sa iyang pagsusi sa mga pulis.
Gipasidunggan usab ang University of San Carlos, Sinulog Foundation Inc., Konsehal Phillip Zafra, Konsehal Dave Tumulak, Anton Perdices, Cary Santiago, Engr. Manuel Mendoza, ug Atty. Dean Decal.
“In different ways, they have made contributions to Cebu City in the field of business, peace and order, creativity and in various fields of endeavor,” pasabot sa mayor.
Si Labella nipasabot nga iyang gipasidunggan silang De Leon, Soriano, Tumulak ug Zafra ug ang SFI gumikan sa ilang dako nga natampo sa kalampusan sa Sinulog 2020.
Silang Barandog, Garma ug Sinas gihatagan og award gumikan sa ilang pakigubat sa illegal nga druga. (PAC)