SUPERBALITA CEBU

Supply sa face masks nabalik na

GIPAHIBAWO sa Department of Trade and Industry (DTI) 7 nga hingpit nang nahibalik sa normal ang supply sa surgical masks human niadtong nagnihit kini subay sa hulga sa coronavirus disease (Covid-19).

Matod ni DTI 7 Regional Director Asteria Caberte, bisan kon nahibalik na sa normal ang supply, pabilin ang ilang price freeze sa Department of Health (DOH) sa masks.

Nagsugod pagnihit sa surgical masks dihang nikompirmar ang DOH sa labing una nga kaso sa Covid-19 sa nasod.

Gani, miagi sa Sugbo ug milaag pa sa Dumaguete ang Chinese national hinungdan nga usa ang Sugbo nga nakasinati og kanihit sa surgical masks ingon man aduna’y nibaligya niini nga wa masubay sa suggested retail price sa DTI.

Dihang nagsugod ang hulga, nag-panic buying ang publiko ug dali nga nagpalit og masks.

Matod ni Caberte, sa national, anaa sa 80,000 matag adlaw ang normal nga supply sa surgical masks.

Gibutyag niini nga nabalik na ang supply human nanggawas na usab kadtong mga supply nga gipang-hold.

Dugang sa direktor nga aduna sila’y nakit-an nga local supplier nga maka-produce og 80,000 ka surgical masks matag adlaw. Gani nakakita usab ilang ahensiya og supplier nga gikan sa laing nasod.

Tungod sa price freeze, magpabilin nga anaa sa P1 ngadto sa P8 ang matag buok sa surgical mask samtang anaa sa P105 ang N96 nga mask.

Matod ni Caberte, nagpadayon ang ilang monitoring sa presyo sa face masks dili lang sa mga botika apan lakip na kadtong mga naninda online.

Aduna’y mga tindahan ang giisyuhan sa DTI og show cause order human nga nasakpan kini nga namaligya og face mask nga wala masubay sa SRP. (HBL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph