Illegal drugs motibo sa pagpatay

GITUOHAN sa hepe sa Waterfront Police Station nga adunay kalambigitan sa illegal nga drugas ang pagpusil patay kang Jorjie Gracia sa dalan Legaspi, Barangay San Roque, Siyudad sa Sugbo niadtong Lunes sa gabii, Pebrero 24.

Matod ni Police Major Joemar Pomarejos nga sa wa pa ang pagpamusil, nakadawat na silag impormasyon nga adunay gun-for-hire nga giila nga alyas Jorjie ang mag-anhaan sa Barangay San Roque.

Giingong wa kini magpuyo sa Barangay San Roque sanglit naa kini sa laing barangay.

Adunay higala nga drug personality si Gracia nga iyang kanunay nga bisitahon matag adlaw.

Apan pasado alas 9 sa gabii niadtong Lunes, duha ka mga tawo nga sakay sa motorsiklo nipusil kang Gracia samtang luwan sa iyang bisiklita.

“Related ni sa katong info nga na koan namo bah, koan diay ni kanang member nig gun-for-hire nya link siya sa kaila niya nga drug personality. Makakoan gyud mi ani nga drug related ni nga incident,” matod ni Pomarejos.

Igo sa kilid sa lawas ang naangkon ni Gracia hinungdan sa iyang hinanali nga kamatayon.

Giingong nagplano matod pa ang grupo ni Gracia ug ang drug personality sa San Roque nga aduna silay likidahon.

Tungod sa kasayuran, nagduda ang mga imbestigador sa Waterfront Police Station nga away sa duha ka mga grupo nga nalambigit sa illegal nga drugas ang hinungdan sa pagpatay kang Gracia. (BBT, AYB)