OPLAN Tokhang gihimo sa Talisay City Police ngadto sa 11 ka mga lumolupyo sa barangay nga gilantawan nga ideklarar nga drug-cleared.
Gihimo kini duha ka adlaw sa di pa ang adlaw sa validation aron hingpit nang madeklarar nga drug-cleared ang Barangay Tapul, Dakbayan sa Talisay.
Apan, giklaro sa kapulisan nga kabahin ra kini sa proseso, ilabi na sa gikatakda nga Miyerkules, Pebrero 26, himuon ang onsight validation kon madeklarar ba nga drug-cleared ang maong bukirang barangay.
Ang Tapul usa sa mga barangay sa Talisay nga adunay labing gamay nga populasyon.
Pinangulohan ni Police Major Gerard Ace Pelare gihimo ang tokhang sa 11 ka newly identified individual (NII) nga naapil sa drug watchlist nga mga lumolupyo sa Tapul, Lunes sa udto, Pebrero 24.
Unang nakig-alayon ang kapulisan sa mga sakop sa Barangay Anti-Drug Advisory Council (Badac) nga gipanguluhan sa ilang Kapitan Mary Ann Nolasco.
“Tokhang operations is a pro-active approach conducted by police officers wherein subject individual linked to illegal drugs trade/sale or use will be visited in his/her house in cooperation with Badac and encourage to surrender to police authorities for booking and to undergo community based rehabilitation,” pasabot ni Pelare.
Ang listahan nga gihatag gipaubos nila sa Oplan Tokhang o pagbisita nga anaa sa listahan ug pag-awhag kanila nga mo-surrender ug mopaubos sa community-based rehabilitation.
Gimanduan sila nga mo-report sa police station aron pagmatuod nga sila wa na malambigit pa sa ginadili nga drugas.
Si Pelare naglaum nga makakuha sila og positibo nga tubag gikan sa Philippine Drug Enforcement Agency (PDEA) nga maoy mosusi sa Miyerkules kon matawag na ba nga drug-cleared ang Barangay Tapul.
Luage Group
Lalake nga gipusil patay sa Campo 5, Barangay Manipis, Siyudad sa Talisay niadtong Dominggo nasuta nga usa sa mga mamaligyaay og drugas sa Luage drug group.
Samtang laing upat ka mga downline sa grupo ni-surrender sa kapulisan ug laing upat ka mga giila nga street level individual ug usa ang nakaeskapo.
Sila giila nga ubos gihapon sa Luage drug group ang nasikop Martes sa kaadlawon, Pebrero 25.
Gitug-an ni Pelare nga si Tereso Cabahug, usa sa main courier sa LDG ug pabilin ang ilang pagduda nga aduna nay nahitabo nga away tali sa mga mamaligyaay hinungdan nga gipatay si Cabahug.
Usa sa mga saksi nitug-an nga nakita pa si Cabahug nga adunay kalalis nga nagmotorsiklo ug nisunod dayon ang pagpusil sa makadaghang mga higayon.
Samtang Lunes, Pebrero 24, upat ka drug personalities nga nagpaila nga na-link sa LDG ni-surrender sa police station ug nihatag og impormasyon kalabot sa uban pang downline sa grupo sa Barangay Tabunok.
Hinungdan nga gihimo dayon, Martes sa kaadlawon ang operasyon batok sa ubang downline diha sa mga barangay Biasong ug Tabunok.
"The Luage drug group was recently dismantled with the arrest of the SK Chairman of Lawaan III. There is only one remaining illegal drug personality in the Luage Drug Group identified as Anafe Abrenica. She was the subject of the SW in the latest SEMPO who was able to elude arrest and is already in hiding as she has a pending WOA," asoy ni Pelare.