PITO ka mga barangay gikan sa nagkalain-laing lungsod sa Misamis Oriental ang nakadawat og kantidad alang sa ilang napiling proyekto niadtong Lunes, Pebrero 24, dungan sa pagpakayab sa nasudnong bandila sa Kapitolyo Probinsyal.
Kini nga programa gitawag og Barangay Empowerment Program ubos sa liderato ni Misamis Oriental Governor Bambi Emano. Dili mominos P4.1 milyones ang pundo nga giapod-apod alang sa pito ka mga barangay kung diin midawat niini ang Brgy. Alagatan, Gingoog City, og P887,803.36 alang sa katukoran sa ilang multi-purpose hall, phase 3; P300,000 alang sa Brgy. 12, Gingoog City sa concrete canal cover project; P600,000 sa Brgy. Mahayag, lungsod sa Talisayan, alang sa konstruksyon sa multi-purpose building.
Nakadawat sab og P300,000 ang Brgy. Artadi, Magsaysay, alang sa pagtul-id sa barangay stage ug improvement sa basketball court; P300,000 sa Brgy. Mapulog, lungsod sa Naawan, kini alang sa pagpalambo sa multi-purpose building; P600,000 sa Brgy. Sinai, Laguindingan, alang sa katukoran sa 2-story function hall; ug P1,124,730 sa Brgy. Andales, lungsod sa Initao alang sa konstruksyon sa covered court.
Gibutyag ni Emano nga ang mga kapitanes maoy nagpili niini nga proyekto ug midoul sa iyang buhatan ug gipakita ang ilang bout mahitabo nga proyekto sa barangay.
Dugang niini nga sa iyang katapusan nga termino bout niya nga matibawas ang tanan nga mga proyekto ubos sa barangay empowerment aron daw dili siya mobiya sa lalawigan nga adunay wala nahuman nga proyekto.