HULOG sa kamot sa mga otoridad ang number six most wanted person sa kasong pagpanglugos didto sa probinsya sa Camiguin ang nadakpan dinhi sa siyudad sa Cagayan de Oro.
Giila ang dinakpan nga mao si Renato Balabag, 46, minyo, lumad nga taga Guinsiliban, probinsya sa Camiguin ug nadakpan sa kapulisan diha sa Lapasan ning siyudad sa Cagayan de Oro.
Ang tracker team sa pagpanguna ni Police Captain Arnold Gaabucayan, Provincial Intellligence Branch sa Camiguin uban ang personahe sa Police Station 3 (PS3) sa pagpanguna ni Julius Clark Macariola mihimo og operasyon batok kang Balabag.
Niadtong Lunes, Pebrero 24 sa buntag nadakpan ang suspek sa dihang nagtindog gawas sa usa ka suite sa Lapasan ug dinhi gisilbi ang warrant of arrest sa kasong pagpanglugos.
Walay piyansa nga girekomendar ang korte sa kasong giatubang niini.
Nasuta nga kini ang suspek sa pagpanglugos sa 5-anyos nga batang babaye sa iyang kapuyo nga wala niadtong tungora human nanarbaho og domestic helper sa nasod sa Kuwait niadtong tuig 2015.
Human sa insidente misibat kini ug nagtago-tago sa sulod sa lima ka tuig sa probinsya sa Misamis Oriental ug Bukidnon.
Aminado ang suspetsado sa iyang nahimo apan gipamugos niini nga nabuhat kini gumikan lamang sa iyang kahubog.