GIPASAKAAN og kaso sa biyuda ni anhing Kobe Bryant nga si Vannesa ang operator sa helicopter nga na-crash nga maoy hinungdan sa kamatayon sa basketball legend, sa 13 anyos niining anak nga babaye ug laing pito ka mga tawo.
Ang 72 ka mga pahina nga kaso gisang-at ni Vannesa sa Los Angeles County Superior Court kagahapon atol sa memorial service ni Bryant sa Staples Center diin linibo ka mga tawo ang ningtambong.
Gawas sa Island Express Helicopters, gipasakaan sab og kaso ni Vannesa ang mga sumosunod sa piloto nga si Ara Zobayan, kinsa usa sa nangamatay sa insidente. Wala mohatag og komentaryo ang Island Express kabahin niini.
Lakip sa gisang-at ni Vannesa mao ang kasong pagpasagad. Alang kang Vannesa, nalikayan unta ang insidente kon wala pa moahat og palupad sa helicopter ang piloto gumikan kay dili man unta maayo ang panahon. (AP, ESL)