GIMUGNA ni Khris Middleton ang katapusang siyam ka mga puntos sa Milwaukee Bucks aron agakon ang overall leader sa overtime nga kadaugan batok sa host Washington Wizards, 137-134, kagahapon sa National Basketball Association (NBA).
Dihang na-foul out ang ilang lider nga si Giannis Antetokounmpo sa nahabiling 1:36 minutos sa regulation period, ang Bucks misalig na og maayo kang Middleton.
Niadtong gutloa, igo ra nga naglabaw ang Bucks og tulo ka mga puntos, 121-118.
Human niini, ang Wizards nakamugna og lima ka wala’y tubag nga mga puntos – tanan pulos gimugna ni Bradley Beal – aron pagposte og 123-121 nga labaw sa nahabiling 1:01 ka minutos sa regulation period.
Ang laing sinaligan sa Bucks nga si Eric Bledsoe nakapasulod og duha ka freethrows aron tablahon ang duwa, 123-123, sa nahabiling 54 ka mga segundos sa regulation period.
Naghinugtanay sa ilang bakus ang duha ka mga kampo human niini ug napugos ang overtime.
Gikan sa paglingkod ni Antetokounmpo, kalit lang nibahar ang duwa ni Middleton ug nasipyat kini sa iyang lima ka sunodsunod nga mga itsa hinungdan nga nakahigayon ang Wizards pagposte og 132-128 nga labaw sa nahabiling 1:57 minutos sa overtime.
“It was frustrating,” matod ni Middleton kabahin sa iyang sunodsunod nga mga sipyat.
“I thought they were easy shots, great looks that I knock down a majority of the time. Going into the timeouts, going back on defense, everybody was just telling me to keep shooting.”
Wala miundang sa pag-itsa si Middleton hangtod nga naulian ang iyang pulso ug giagak niini ang Bucks pinaagi sa iyang sagunson nga siyam ka mga puntos nga gisugdan sa iyang duha ka freethrows sa nahabiling 1:47 minutos sa overtime.
Gipangulohan ni Middleton ang Bucks pinaagi sa iyang 40 puntos, nidugang og 23 puntos si Bledsoe samtang niamot og 22 puntos si Antetokounmpo.
Sa kadaugan, napahugtan og samot sa Bucks ang ilang paggunit og overal leadership dala ang 49-8 nga rekord.
Kini maoy ikaduhang sunodsunod nga duwa nga nakamugna og 50 puntos o mas labaw pa si Beal. Nakahimo siya og 53 sa miaging duwa sa Wizards diin napilde sab sila sa Chicago Bulls.
Si Beal maoy labing unang magduduwa sa Wizards nga nakahimo niini.
“I was just locked in and I just was having fun,” matod ni Beal. “Probably the most fun game I’ve ever played in.”
Si Shabbaz Napier nidugang og 27 puntos alang sa Wizards, nga nahagbong sa 20-36 nga rekord, ikasiyam sa Eastern Conference. (AP, ESL)