NATUMAN na ang pangandoy ni Cebu Schools Athletic Foundation Inc. (Cesafi) Mythical Five guard Darrell Shane Menina nga makaduwa sa mas dako nga liga human siya gikuha sa Valenzuela City-Carga Backload Solution sa Maharlika Pilipinas Basketball League (MPBL).
Si Menina usa ka iladong pointguard sa Manila kaniadto sa iyang pagduwa sa Mapua Cardinals ug National University Bulldogs.
Apan nawala siya sa nasyunal nga senaryo gumikan kay nagduwa siya sa Sugbo sa Cesafi ubos sa kampo sa University of Cebu (UC) Webmasters sa miaging pipila ka mga tuig.
Ning tuiga, nakadesisyon si Menina nga dili na motiwas sa nahabilin niyang tuig sa Cesafi ug manimpalad na sa MPBL.
Sa Valenzuela squad, nga gipangulohan ni Paulo Hubalde, ikauban ni Menina ang laing produkto sa Cesafi nga si Tristan Albina, kanhi sakop sa University of the Visayas (UV) Green Lancers.
Sa interbyu sa Sun.Star Cebu, igsuong buhatan ning mantalaan, nagkanayon si Menina nagsagol ang iyang gibati human niya naangkon kining maong oportunidad.
Gipasalig ni Menina nga buhaton niya ang iyang tanan nga makaya aron makatabang sa Valenzuela.
Alang sa lumad nga taga Talisay City, ang pagkasulod niya sa MPBL maoy nakapabuhi og balik sa iyang paglaom sa iyang pangandoy isip basketbolista.
Pipila ka mga buwan ang nakalabay, si Menina na-draft sa Marinerong Pilipino Skippers sa Philippine Basketball Association (PBA) D-League apan wala kini nakapirma og kontrata.
Giangkon ni Menina nga niabot ang punto nga hapit na siya mawad-i og paglaom ug nagsugod na siya’g duda kon aduna ba siya’y kapasidad nga makahimo’g pangalan sa mas dakong liga. (JNP, ESL)