DILI na inilog ang San Miguel Beermen sa umaabot nga Philippine Basketball Association (PBA) Philippine Cup atol sa panaghugpong sa league governors kagahapon sa Conrad Manila Hotel.
Nagkausa ang tanang stakeholders sa liga nga ning higayuna, grabe na ka balanse ang kompetisyon gumikan sa pagkawagtang sa Sugboanong higante sa Beermen nga si JuneMar Fajardo.
Si Fajardo nabalian og bukog sa iyang tuo nga tiil atol sa praktis sa Beermen ug dili kini makaduwa sa nagkaduol nga Philippine Cup ug posible, sa tibuok gyud season.
Ang Beermen maoy naghari sa miaging lima ka Philippine Cup gumikan sa dominasyon ni Fajardo sa ilawom nga bahin.
Wala’y nakapugong sa produkto sa University of Cebu (UC) Webmasters, kinsa milangkat og MVP awards sulod sa lima ka sunodsunod nga katuigan.
“The last five PBA press conferences, ang prediction ay laging San Miguel Beer,” matod ni San Miguel team governor Robert Non nga napatik sa PBA.PH. “Okay naman, we won five championships.”
Apan ning higayuna, lahi na ang tono sa stakeholders diin adunay nagtuo nga ang mopatigbabaw mao ang Talk N’ Text KaTropa ug aduna sab nag-ingon nga ang Magnolia Ang Pambansang Manok Hotshots.
Bisan wala ang ilang kaugalingong higante nga si Greg Slaughter, ang Bgy. Ginebra Gin Kings nahilakip sab sa sayong mga inilog sa komperensya.
“The teams right now are really balanced,” matod ni Erick Arejola sa NorthPort Batang Pier.
“Sa akin, ang bet ko ngayon, tingin kong malakas na team ang Talk ‘N Text,” asoy sab ni Alfrancis Chua sa Ginebra.
“I think it will be the Hotshots and TNT who will dominate the games next season,” komentaryo ni Mamerto Mondragon sa Rain or Shine Elasto Painters.
“We’ve played three tune-up games, and I think Rain or Shine and Ginebra will be the teams to beat in this coming All-Filipino,” matod ni Rene Pardo sa Magnolia.
Hinuon adunay mga nag-ingon nga bisan wala si Fajardo, aduna gihapon sakto nga ikabuga ang Beermen, nga nagtinguha sa ilang ikaunom nga sunodsunod nga All-Filipino title.
“Alam mo ‘yung teams ni June Mar at ni Greg, malakas pa din ‘yun kahit wala sila,” batbat ni Bobby Rosales sa Columbian Dyip. “So it will still be a challenge to all the other teams when we face them.”
Ang Philippine Cup sa 45th season sa PBA mosugod karong Marso 8 sa Araneta Coliseum. (ESL)