MARIJUANA plantation sa Barangay Tagba-o, bukirang dapit sa Dakbayan sa Sugbo, gironda sa mga sakop sa City Mobile Force Company sa Cebu City Police Office (CCPO).
Nakasakmit usab ang kapulisan sa Dakbayan sa Lapu-Lapu og P3 milyunes nga balor sa shabu.
Moabot ngadto sa 15,000 ka mga punoan sa marijuana ang naibot sa mga sakop sa CMFC sa pagpangulo ni Police Lieutenant Colonel Randy Korret sa tulo ka managlahing mga lugar sa sitio Manggabon, Barangay Tagba-o, Siyudad sa Sugbo alas 3:30 sa hapon sa Martes, Pebrero 25, 2020.
Gibana-bana nga mobalor ang tanan og P6 million ang maong mga pananom nga giugmad sa usa ka Robert Alcantara, kinsa wa na nila maabti pa.
Matod ni Korret nga ang mga punoan sa marijuana nakaplagan sa residente sa dapit.
Gitaho dayon ngadto sa kapulisan atol sa ilang operation batok sa loose firearms sa bukirang barangay sa Dakbayan sa Sugbo.
Tungod niini, gihimo dayon sa CMFC ang Oplan Vanadium nga niresulta sa pagkaibot sa marijuana.
Gisunog ra usab dayon nila sa maong lugar ubos sa pagtugot sa Philippine Drug Enforcement Agency 7 (PDEA) 7.
Nagkuha lang og sample ang kapulisan alang sa eksaminasyon sa PDEA7 laboratory alang sa pag-ila sa matang sa marijuana.
Gidugang ni Korret nga naa sa hilit nga dapit ang marijuana nga gipailawman sa kawayanan hinungdan nga wa nila makita sa ilang drone nga gipalupad sa dapit.
“Yan ang plan namin. Nag-coordinate na kami sa advisory council ng CMFC. They will be providing yung mga seedlings ng bamboo. Kasi doon sa plantation site, may bamboo yan yung cover actually ng marijuana kaya hindi namin makita sa drone,” matod ni Korret.
Labing una kini nga adunay nakuhang pananom sa marijuana sa Barangay Tagba-o.
Iya usab nga gipahimangnoan ang iyang mga sakop ug kadtong mga tawo sa bukid nga mosusi sa mga umahan nga gitamnan sa marijuana nga mag bantay tungod sa booby trap kun lit-ag.
Adunay gibutang nga mga tunok ang mga nagtanom sa mga marijuana.
Ang mga pulis sa probinsya sa Sugbo, atol sa ilang operasyon sa lungsod sa Balamban, hapit matunok human mabuwasot ang tiil sa gituyo nga lit-ag.
Nagduda si Korret nga alang sa mga police ang maong booby trap panahon nga himuon ang anti drug operation.
Buy Bust
Mokabat sa P3 milyones ang balor sa ginadiling drugas nga nasakmit sa mga sakop sa Pusok Police Station sa Lapu-Lapu City Police Office (LCPO) sa tulo ka sunod-sunod nga mga buy-bust operation niadtong gabii sa Martes, Pebrero 25 ug sa Miyerkules sa kaadlawon Pebrero 26.
Unang nasikop sa buy-bust sa kapulisan alas 11 sa Martes sa gabii mao ang usa ka Romulo Soreño Sr., alyas “Amay”, 49, taga Mahayahay, Bankal, Dakbayan sa Lapu-Lapu.
Nakuhaan si Soreño og moabot sa 4 ka mga putos sa gituohang shabu nga motimbang og 150 gramos ug mokantidad usab og P1,020,000.
Gisulod kini ni Soreño sa usa ka sling bag.
Matod ni Police Captain Aibert Jay Samson, hepe sa Pusok Police Station nga si Soreño sakop sa usa ka drug group nga nagbase sa Barangay. Bankal kaniadto.
Ni-surrender kini sa kapulisan niadtong Nobiyembre 2017 atol sa unang hugna sa Oplan Tokhang.
Human masikop si Soreño, dali usab kini nga mitug-an sa iyang supplier hinungdan nga usa ka follow-up operation sa kapulisan sa may Kauswagan, Barangay Bankal pasado alas 12 sa tungang gabii, nasikop si Jovy Mansueto Dalocanog, alyas “Ivan”, 30, taga Sitio Tumoy, Barangay Ibabao lungsod sa Cordova.
Nakuhaan usab si Dalocanog og upat ka ka putos sa gituohang shabu nga gibana-banang motimbang og 150 gramos ug mokantid og P1,020,000.
Dihang nasikop na si Dalocanog mitug-an na usab kini matod pa sa iyang supplier hinungdan nga nasikop usab sa laing follow-up operation sa kapulisan ang 19-anyos nga si Fritz Gerald Doblados ala 1 sa kadlawon sa may Casia, Barangay Bankal.
Si Doblados nga taga dan Magsaysay, Barangay Suba, dakbayan sa Sugbo, nakuhaan usab og upat ka putos sa gituohang shabu nga motimbang og 150 gramos ug mokantidad usab og P1,020,000.