SUPERBALITA CEBU

ARQ Builders kampiyon sa 1st Cebu City Charter Cup

CEBU. Si Cebu City Mayor Edgar Labella uban ni City legal counsel Atty. Rey Gealon (tunga) pormal nga mi-award sa championship trophy ug ganting salapi ngadto sa kinatibuk-ang puwersa sa ARQ Builders/KSB Glasss nga gipangulohan sa team-owner nga si Jayson Arquisola niining aktoha. (Hulagway ni Jun Migallen)

GILANGKAT sa ARQ Builders/KSB Glass ang kampiyonato sa 1st Cebu City Mayor Edgar Labella Charter Cup pinaagi sa pagpukan sa Kiboy's Computer Solution (KCS), 98-90, kagabii, Martes, Pebrero 25, 2020, sa Sports Institute Gym sa Sawang Calero, Dakbayan sa Sugbo.

Sa makausa pa, ang beteranong si Ferdinand Lusdoc mipakita na usab sa iyang kahanas sulod sa korte aron pangulohan ang ARQ Builders ngadto sa saktong dominasyon.

Siya mipuga og 25 puntos ug mao'y napiling most valuable player sa usa ka semanang torneyo nga gipasiugdahan sa Mayor's Office ug sa Cebu City Sports Commission (CCSC).

Nagsugod pagbingat ang labaw sa Builders human kini makaposte og 52-40 nga bintaha sa layup ni Reed Juntilla, 23 segundos paingon nga mosira ang first half.

"At least, ni-execute gyud ang mga bata sa among game plan. Akong gi-review katong among duwa nga napildi mi nila. So among gibuhat mi-adjust mi, wala mi mosabay sa ilang speed. Nya agresibo sab among depensa," matod ni ARQ coach Marvin Caro, kinsa usa sa mga deputy coach sa National University (NU) Bulldogs sa UAAP.

Misugod og kaamag ang kadaugan sa ARQ sa dihang nakaposte kini og 76-56 nga labaw, 3:56 segundos sa third quarter, kortesiya sa tres ni Shaquille Imperial ug sa layup ni Lusdoc.

Laing naghatag og labad sa ulo sa Kiboy's mao si Jerrick Canada kinsa maayong nakapabutog upat ka tres.

Hinuon, miduwa ang Kiboy's nga wala si Ted Saga ug Gabriel Cometa. Si Saga kinsa nasigpatan nga nagsibilyan lang, giingong adunay hilanat.

Samtang sa laing duwa, gilabni sa Fighter 50 ang ikatulong luna pinaagi sa makutas nga kadaugan, 68-66, batok sa Aspa Formworks.

Ang short jumper si Kevin Villafranca nga tukma usab sa pagkapupos sa oras maoy nahimong yawe sa kadaugan sa Fighter 50.

Mga puntos:

Unang duwa:

Fighter 50 (68) - Villafranca 16, Gravera 14, Gabisan 9, Hontiveros 8, Galinato 8, Sealan 4, Roncal 4, Mantilla 3, Yap 2. Aspa (66) - Baclaan 16, Omolon 16, Niones 13, Tarrosa 7, Codilla 5, Regeno 4, Ponce 3, Canete 2. Quarterscore: 23-12, 11-19, 13-16, 21-19.

Ikaduhang duwa:

ARQ Builders (98) - Lusdoc 25, Juntilla 16, Nylon 12, Canada 12, Munoz 11, Imperial 10, Tangkay 10, Gabas 2. KCS (90) - Minguito 23, Dela Cerna 23, Cincoflores 10, Lao 9, Ceniza 8, Bonganciso 7, Berami 6, Butohan 2, Delator 2. Quarterscore: 21-23, 33-19, 26-25, 18-13.

(JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph