GIPAMATUD-AN ni Aljay Alloso ang iyang katakus, giaswat ang Holy Child College of Davao (HCCD) Red Eagles sa kadaugan, 110-76 kontra St. Mary’s College of Tagum (SMCT) Hawks sa National Basketball Training Center (NBTC) regional championship, Dominggo, Pebrero 23 sa University of Mindanao (UM) Matina Gym.
Ang NBTC Davao City finals most valuable player (MVP) mipabuhagay og 33 puntos, apil na lima ka triple, diin ang tim nga gigiyahan ni coach Nestor Sorrosa nanimawos sa Hawks nga mipildi nila sa 2019 NBTC regional finals.
Ang taga-Midsayap nga si Alloso, 19-anyos ug Grade 12 sa Humsss nagkanayon nga malipayon siyang nakaduwa og usab human mabalda.
“Feeling blessed po kasi galing ako injury tapos nakabalik ako ulit maglaro binigyan pa ako ni God ng isang chance para makabalik.”
Nagpasalamat sab siya sa Ginoo nga nahatagan siya og higayon sa regional championship human napildi niadtong 2019 ug wa makaduwa.
“Happy po ako talaga nung nag-champion kami. Words are not enough to describe my feelings,” suma niya sa pakighinabi sa SunStar Davao sa Facebook Messenger.
Si Marvin Samonte midugang sab og 16 puntos alang sa Davao City squad.
Suma ni Coach Sorrosa, “Nakabawi rami karon.”
Dugang niya nga ang hugot nilang depensa nakapakyas sa SMCT nga makapuntos.
“Depensa jud. Daghan maayo nilang mga shooters pero at least sa ilalom, makuha namo rebound. Ang among point guard si Alloso ni pick-up jud. Tanan nag-contribute jud sa among daug.”
Sigun pa niya nga alang sa Marso 21 ngadto 27 nga NBTC national finals sa Mall of Asia Arena, usa ka magduduwa gikan Jose Maria College (JMC) ang motabang sa ilang kampanya.
Ang Holy Child gilangkuban nila Victor Joshua Bedoya, Raven Gumban, Kyle Jamora, John Deanyel Orac, Dave Solon, Philip Miguel Anasco, James Dean Michaelson Belicario, Aeron Jeswill Awe, John Carl Aballe, Rhude Jay Villaflores, Froilan Palcis, ug Ralf Bernhard Panto.