Nalinogan gitabangan sa LGU pinaagi sa PCSO

(davao.ph.emb-japan.go.jpg)
(davao.ph.emb-japan.go.jpg)

KIBLAWAN, Davao del Sur -- Ipanghatag na sa lokal nga gobyerno ang P1 milyon nga cash assistance gikan sa Philippine Charity Sweepstakes Office (PCSO) ngadto sa mga biktima sa sagunson nga linog niadtong bulan sa Oktubre ug Disyembre 2019 kinsa nawad-an og kapuy-an.

Sumala ni Mayor Carl Jason Rama, karong semanaha sugdan ang pagbahin sa maong kantidad ngadto sa 30 ka mga barangay.

Matud sa mayor nga makadawat sab og tag P40-50 mil nga cash assistance gikan sa lokal nga gobyerno ang matag barangay. Ang kantidad mag-agad kon destroyed o damaged ang mga balay.

Ang nahitabong linog sa miaging tuig maoy hinungdan nga mihiklin ang 7,482 ka pamilya sa nagkadaiyang barangay padung sa evacuation center.

Ang tabang sa PCSO bahin sa mga biktima sa linog diin makadawat sila og P3,000 ug P5,000 depende sa ilang gi-blotter kon destroyed o damaged.

“This will be an additional funds from the cash assistance earlier released by the Department of Social Welfare and Development in the amount of P3,000,” asoy sa mayor.

Sumala ni Rama nga gisugdan na nila ang rehabilitation plan human ang Bag-ong Tuig ug gilaraw na ang pagtukod sa bag-ong munisipyo, motor pool, rehabilitasyon sa istasyon sa pulis ug pagtukod og bag-ong legislative building aron ilahi na gikan sa karaang munisipyo apil ang pagbutang og “school of living tradition.”

Gawas sa financial assistance, mihanyag sab ang lokal nga gobyerno og cash for work alang sa mga biktima sa linog aron sila maka-recover dayon gikan sa kalamidad.

Hinuon, giklaro sa mayor nga una nang nakadawat og mga food assistance ang mga biktima human sa pagtay-og sa linog.

Apan, matod ni Rama nga padayon silang nangalap og hinabang ngadto sa nagkadaiyang national agencies ug buhatan sa mga senador.

Gidason sa amahan sa lungsod nga kinahanglan sab nila ang pag-andam og contingency aron magamit dayon sa takna sa kalamidad ug gidasig ang mga kapitan nga himuon sab kini sa ilang barangay. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph